SHGM reagon: Thirrjet e Ministrisë së Shëndetësisë për kufizim të mediaс, shkelje e lirive demokratike

Shoqata e Gazetarëve të Maqedonisë (SHGM) shpreh shqetësim lidhur me komunikimin publik të Ministrisë së Shëndetësisë, e cila u ka bërë thirrje mediave të kufizojnë përmbajtjen e raportimeve të tyre, duke përfaqësuar kështu një praktikë të dëmshme institucionale në marrëdhëniet me mediat.

СHGM dënon fuqishëm përpjekjen e Ministrisë për të imponuar rregulla mbi mënyrën e raportimit, veçanërisht për ngjarje me interes të madh publik. “Udhëzime të tilla, megjithëse paraqiten si thirrje, në thelb janë një formë presioni institucional dhe censurë e mundshme, që shkel parimet themelore demokratike dhe të drejtën për lirinë e shprehjes,” thekson SHGM.

Shoqata kujton se neni 16 i Kushtetutës së Republikës së Maqedonisë së Veriut garanton lirinë e informimit publik dhe ndalon censurën. “Çështjet e etikës dhe profesionalizmit gazetaresk janë fushë ekskluzive e vetërregullimit dhe i përkasin Këshillit për Etikë në Media dhe Gjykatës së Nderit pranë SHGM-së, të cilat janë të vetmet autoritete për vlerësimin e normave etike,” shton deklarata.

SHGM u bën thirrje gazetarëve dhe mediave të vazhdojnë të raportojnë me profesionalizëm dhe ndjeshmëri, veçanërisht kur bëhet fjalë për ngjarje tragjike dhe grupe të ndjeshme. Megjithatë, ajo paralajmëron: “Çdo përpjekje për kufizim institucional të qasjes në informacion dhe raportimit është e papranueshme dhe dëmton interesin publik.”

Shoqata thekson gatishmërinë për dialog me institucionet për përmirësimin e transparencës dhe bashkëpunimit, duke nënvizuar se mbështet fuqimisht pavarësinë redaktoriale, lirinë e mediave dhe të drejtën e publikut për informacion – vlera të pakontestueshme të shoqërisë demokratike. Flaka