Ali Ahmeti me thirrje për VLEN-in: Braktisni institucionet – dëmtojnë interesin shqiptar!

Kryetari i Bashkimit Demokratik për Integrim (BDI), Ali Ahmeti, edhe sot ka përsëritur thirrjen e tij drejtuar koalicionit shqiptar në Qeveri, VLEN-it, që të largohet nga institucionet shtetërore, duke i akuzuar ato për qasje denigruese ndaj shqiptarëve.

Në një deklaratë për media, Ahmeti u shpreh se pjesëmarrja në institucione që, sipas tij, nuk i mbrojnë interesat kombëtare të shqiptarëve, është e papranueshme.

“Për fat të keq, në historinë e shqiptarëve ka pasur njerëz që nuk e kanë mbrojtur interesin kombëtar, por kanë parë vetëm interesat e tyre personale,” deklaroi Ahmeti.

Ai shtoi se institucionet aktuale, ku përfshihet edhe koalicioni VLEN, sipas tij, nuk kanë më legjitimitet për të përfaqësuar interesin shqiptar.

“Ne disa herë u jemi drejtuar të LEN-it, që më nuk është VLEN, që të braktisin këto institucione të cilat në programin e tyre kanë pasur poshtërimin e shqiptarëve, tjetërsimin e shqiptarëve, rrënimin e gozhdimit të arkivolit përfundimtar të Marrëveshjes së Ohrit,” u shpreh lideri i BDI-së.

Vijon përplasja politike në kampin shqiptar

Thirrja e radhës nga Ahmeti vjen në një klimë të tensionuar politike mes BDI-së dhe koalicionit VLEN, i cili aktualisht është pjesë e Qeverisë së re të Maqedonisë së Veriut.

BDI, tashmë në opozitë pas mbi dy dekadash në pushtet, ka kritikuar ashpër mënyrën e funksionimit të Qeverisë dhe ka shprehur shqetësime për, siç i quan, devijime nga fryma e Marrëveshjes së Ohrit. Flaka