Noni Madueke pranë Arsenalit – marrëveshja personale e arritur

Arsenali ka hyrë në fazën e negociatave direkte me Chelsean për transferimin e sulmuesit anglez Noni Madueke, i cili ka pranuar një kontratë pesëvjeçare me “Topçinjtë”. Lajmi është konfirmuar nga gazetari i njohur Fabrizio Romano dhe më pas nga David Ornstein, duke e bërë këtë lëvizje një nga më të përfolurat të merkatos së verës.

Megjithëse marrëveshja personale mes lojtarit dhe Arsenalit është finalizuar, ekziston ende një diferencë në vlerësimin financiar mes dy klubeve. Chelsea kërkon një shumë prej 50–55 milionë euro, ndërsa Arsenali po përpiqet të negociojë një çmim më të ulët për të realizuar transferimin.

Madueke, 23 vjeç, është pjesë e Chelseat që nga janari i vitit 2023, kur u transferua nga PSV Eindhoven për 29 milionë euro. Ai ka luajtur 91 ndeshje, ka shënuar 11 gola dhe ka dhënë 5 asistime, duke u shfaqur si një talent premtues në krahun e djathtë të sulmit.

Trajneri i Chelseat, Enzo Maresca, ka lënë të hapur mundësinë e largimit të lojtarëve që nuk janë të lumtur në klub:

“Dua vetëm lojtarë që janë të lumtur të jenë me ne. Ata që nuk janë, janë të lirë të largohen,” deklaroi Maresca pas ndeshjes në Kupën e Botës për Klube.

Madueke, i cili është produkt i akademisë së Tottenhamit, mund të rikthehet në veri të Londrës, por këtë herë me fanellën e Arsenalit. Ai shihet si një alternativë për të lehtësuar ngarkesën e Bukayo Saka, i cili ka qenë titullar i padiskutueshëm në krahun e djathtë, por ka vuajtur nga lodhja dhe dëmtimet sezonin e kaluar.

Chelsea, nga ana tjetër, ka nevojë të balancojë financat pas shpenzimeve të mëdha në merkato dhe marrëveshjes me UEFA-n për regjistrimin e lojtarëve në Champions League. Kjo e bën shitjen e Maduekes një opsion të arsyeshëm për klubin.

Flaka