Taravari paralajmëron platformë gjithëpërfshirëse për shqiptarët – Jo për parti, për bashkim kombëtar

Kryetari i Aleancës për Shqiptarët, Arben Taravari, ka dalë sot me një deklaratë publike ku paralajmëron prezantimin e një platforme gjithëpërfshirëse, që synon të ofrojë një vizion të përbashkët për shqiptarët në Republikën e Maqedonisë së Veriut.

Në fjalimin e tij drejtuar mediave dhe opinionit publik, Taravari theksoi se kjo iniciativë nuk është një projekt partiak, por një thirrje për bashkim kombëtar dhe përgjegjësi të përbashkët për të ardhmen politike, ekonomike dhe shoqërore të shqiptarëve në vend.

“Le ta tejkalojmë ndarjen. Le t’i bashkojmë energjitë tona për një vizion të përbashkët”, u shpreh Taravari.

Platforma do të bazohet në shtatë shtylla kryesore:

• Identitet & Traditë – Mbrojtja e gjuhës, kulturës dhe vlerave kombëtare shqiptare
• Ekonomia për Shqiptarët – Lehtësira për bizneset, mbështetje për bujqësinë dhe iniciativat private
• Arsimi & Rinia – Rritja e cilësisë arsimore dhe formimi i një elite të re kombëtare
• Familja & Politikat Sociale – Mbështetje për familjet dhe shtresat më të prekura
• Shëndetësia – Investime dhe reforma konkrete në komunat shqiptare
• Zhvillimi Rajonal & Diaspora – Politika për rikthimin dhe përfshirjen aktive të diasporës
• Bashkëpunimi Ndërkombëtar – Marrëdhënie strategjike me SHBA, BE dhe aleatët e tjerë

Taravari nënvizoi se kjo platformë do të jetë një hap drejt unitetit, duke ftuar të gjithë shqiptarët e Maqedonisë së Veriut të bëhen pjesë aktive e këtij procesi për “një të ardhme më të drejtë, më dinjitoze dhe më të sigurt”.