Inaugurimi i një pjese të rrugës Kërçovë–Ohër, kaloi nën hijen e mungesës së gjuhës shqipe!

Në ceremoninë e inaugurimit të segmentit të autostradës Preseka–Pesoçan, pjesë e aksit Kërçovë–Ohër, ajo që ra në sy ishte mungesa e gjuhës shqipe në tabelat rrugore. Mbishkrimi që tregon kilimetrat drejt Shkupit dhe Kërçovës, ishin vetëm në gjuhën maqedonase dhe atë angleze, shkruan Flaka.

“Kjo është një qeveri që udhëhiqet nga VMRO-DPMNE, në bashkëpunim me koalicionin VLEN dhe partinë politike ZNAM. Ne nuk premtojmë shumë, por atë që e premtojmë – e realizojmë”, tha Mickoski.

Në inaugurimin e këtij segmenti mori pjesë edhe zv.kryeministri Izet Mexhiti, i cili e përgëzoj këtë investim.

“Si Qeveri, kemi marrë përgjegjësinë për të realizuar projekte që e nxjerrin vendin nga izolimi dhe e vendosin në funksion të bashkëpunimit rajonal dhe të ardhmes europiane”, tha Mexhiti.

Edhe në pjesët ku punohet ende në këtë autostradë, sinjalistika në kantier është vetëm në maqedonisht.

Edhe në fund të muajt qershor, mediat raportuan që tabelat rrugore në aksin nga Kërçova drejt Strugës dhe Qafë Thanës, gjuha shqipe ishte zhdukur krejtësisht prej tyre. Tabelat janë veendosur vetëm në maqedonisht dhe anglisht.

Ky veprim vjen në një moment të ngarkuar politik, me tensione ndëretnike në rritje dhe në një kontekst kur qeveria e re po kritikohet për përjashtim të shqiptarëve nga institucionet publike. Flaka