Nga akuza në autogol politik – Mexhiti “zbulon” se ka ndërtimet pa leje në Çair – por kush i lejoi për 20 vite?

Deklarata e fundit e liderit të Lidhjes Demokratike, Izet Mexhiti, ka hapur debat të gjerë publik për shkak të kontradiktave që përmban. Në përpjekje për të akuzuar kundërshtarin politik nga BDI, Bujar Osmani, për banim në një objekt pa leje në Çair, Mexhiti pa dashje ka pranuar se në këtë komunë ekzistojnë ndërtime të paligjshme – pikërisht në territorin që për dy dekada është drejtuar nga ai vetë dhe bashkëpunëtori i tij politik, Visar Ganiu.

“Nëse jemi te ndërtimet pa leje, kandidati i BDI-së për Çair, Bujar Osmani, jeton në një të tillë. Prandaj nuk mund të flasë për ndërtimet e paligjshme,” deklaroi Mexhiti.

Por reagimet nuk vonuan. Kryetarja e Shkupit, Danella Arsovska, i doli në kundërpërgjigje:

“A është ndërtuar ajo ndërtesë me falsifikime dhe pastrim parash? Zoti Izet, pse nuk e shemb atë të BDI-së, kur Visari yt i ka gati bagerët? Nëse i frikësohet si zakonisht, le t’i telefonojë ministrit të Transportit, Aco Nikolovski, përpara se të nisë të shembë vilat në Ohër – ndoshta kryen ndonjë punë edhe në Çair.”

Ajo e mbylli mesazhin me një sfidë të drejtpërdrejtë:

“Nëse nuk po gënjen, fillo aty – dhe pastaj vazhdo me milionerin 5-vjeçar që paska ndërtuar pallate!”

Kontradikta dhe përgjegjësi politike

Kjo deklaratë e Mexhitit nuk kaloi pa kritika nga opinioni, duke theksuar se përgjegjësia për ndërtimet pa leje bie pikërisht mbi udhëheqësit lokalë që për më shumë se 20 vite kanë qenë në krye të Komunës së Çairit. Mexhiti dhe Ganiu, përveç se kanë pasur pozitat më të larta politike në nivel lokal, kanë qenë edhe vendimmarrës për dhënien apo mosndërhyrjen në rastet e ndërtimeve të paligjshme.

Fakti që tani Mexhiti flet për ndërtime pa leje në një komunë që vetë e ka drejtuar ngre pyetje të qarta:

• Pse nuk janë marrë masa më herët?
• A ka pasur selektivitet politik në trajtimin e ndërtuesve pa leje?
• Kush përfiton nga kjo luftë deklarative?

Në fund, zërat kritikë e shohin këtë përplasje si pjesë të një lufte elektorale, ku tema si “ndërtimet pa leje” përdoren për poena politikë, ndërsa qytetarët vazhdojnë të jetojnë në një realitet urban të pasigurt dhe shpesh të paligjshëm. Flaka