Valë të të nxehtit kap vendin – deri në 41 gradë Celsius në Shkup

Sot vendi do të përballet me një ditë jashtëzakonisht të nxehtë dhe me diell, me temperatura që në disa rajone do të arrijnë deri në 41 gradë Celsius, paralajmëron Drejtoria për Punë Hidrometeorologjike (DPHM).

“Pritet mot i kthjellët, me vranësira të pakta lokale dhe erë të lehtë deri mesatare nga drejtimi i ndryshueshëm,” njofton DPHM në buletinin zyrtar të mëngjesit.

Temperaturat për sot:

• Minimalet: prej 12 deri 21 gradë Celsius
• Maksimalet: prej 35 deri 41 gradë Celsius

“Kjo është një nga ditët më të nxehta të këtij sezoni. Në shumë pjesë të vendit, veçanërisht në rajonet e ulëta dhe urbane, si Shkupi dhe Vardari, temperaturat do të kalojnë kufirin e 40 gradëve,” paralajmërojnë meteorologët.

Moti në Shkup:

Në kryeqytet do të mbizotërojë mot me diell, shumë i ngrohtë dhe me erë të lehtë deri në mesatare nga drejtimi veriperëndimor.

• Temperatura minimale: 21°C
• Temperatura maksimale: 41°C

“Kombinimi i temperaturave të larta dhe mungesës së reshjeve krijon kushte për tharje të tokës dhe rritje të rrezikut për zjarre në ambiente të hapura,” theksohet në njoftimin zyrtar.

Rekomandime për qytetarët:

Autoritetet shëndetësore dhe emergjente apelojnë për kujdes të shtuar gjatë valës së të nxehtit:

• Të shmanget ekspozimi i drejtpërdrejtë në diell nga ora 11:00 deri 17:00
• Të konsumohet sa më shumë ujë dhe lëngje
• Të mbahen ambiente të freskëta dhe të përdoren veshje të lehta dhe me ngjyrë të çelët
• Të evitohen aktivitetet fizike intensive gjatë ditës

“Grupet më të ndjeshme si fëmijët, të moshuarit dhe personat me sëmundje kronike duhet të kenë kujdes të veçantë,” paralajmëron Instituti për Shëndet Publik. Flaka