Gjuha Shqipe ndër më të vjetrat në familjen indoevropiane: studimi që përforcon origjinën autoktone të shqiptarëve

Një artikull shkencor i publikuar së fundmi hedh dritë mbi origjinën e gjuhëve indoevropiane – përfshirë shqipen, armenishten dhe greqishten – duke përdorur metoda të avancuara të analizës gjuhësore dhe gjenetike. Të dhënat e prezantuara konfirmojnë se gjuha shqipe është një nga gjuhët më të vjetra indoevropiane që ende flitet sot, me origjinë të hershme dhe karakteristika të ruajtura origjinale.

Krahas analizave gjuhësore të kryera përmes modeleve kompjuterike të inferencës bayesiane, studimi përfshin edhe të dhëna gjenetike të ADN-së së lashtë, të cilat dëshmojnë se popullsia shqiptare është autoktone dhe shumë e lashtë në këto territore. Të dyja këto shtylla kërkimore e plotësojnë njëra-tjetrën dhe çojnë në një përfundim të qartë shkencor: si gjuha, ashtu edhe populli shqiptar janë të pranishëm në Ballkan që të paktën 6000 vjet më parë.

Studimi mbështet një hipotezë hibride mbi origjinën e gjuhëve indoevropiane, duke i vendosur fillesat e tyre rreth 8000 vjet më parë, në jug të Kaukazit, me një degëzim të mëvonshëm drejt stepave. Kjo përputhet me gjetjet më të fundit të ADN-së së lashtë dhe sfidon si hipotezën tradicionale të stepave, ashtu edhe atë të bujqësisë si burim i vetëm.

Në përmbledhje, artikulli i botuar në revistën prestigjioze Science thekson se familja gjuhësore indoevropiane mbulohet sot nga pothuajse gjysma e popullsisë globale, por origjina e saktë e saj dhe mënyra e përhapjes mbeten ende çështje komplekse dhe të hapura. Kontributi i këtij studimi është themelor, pasi vendos gjuhën shqipe dhe popullin shqiptar në qendër të hartës historike dhe shkencore të qytetërimit indoevropian.