Isen Shabani kandidon për mandatin e tretë në Vrapçisht – Aleanca për Shqiptarët beson në vazhdimësi

Aleanca për Shqiptarët ka zyrtarizuar Isen Shabanin si kandidat për kryetar të Komunës së Vrapçishtit në zgjedhjet lokale të tetorit 2025. Shabani, që prej vitit 2017 udhëheq komunën e Vrapçishtit, kandidon për mandatin e tij të tretë, duke kërkuar mbështetje për të vazhduar projektet dhe vizionin e tij zhvillimor.

Kush është Isen Shabani?

I lindur më 2 janar 1987 në fshatin Gradec, Shabani mbaroi shkollën fillore në vendlindje dhe shkollën e mesme në Gostivar. Studimet universitare i kreu në Universitetin e Evropës Juglindore, ku u diplomua në drejtimin Ekonomi.

Para se të angazhohej në funksione publike, ai drejtoi me sukses disa biznese private, duke u dalluar për menaxhim të qëndrueshëm dhe qasje praktike në zhvillimin ekonomik.

Në gusht të vitit 2017, u emërua drejtor në Inspektoratin Shtetëror të Tregut, ndërsa në të njëjtin vit, fitoi besimin e qytetarëve dhe u zgjodh kryetar i Komunës së Vrapçishtit. Mandati i tij u ripërtëri edhe në zgjedhjet lokale të vitit 2021.

Sot, Shabani kandidon për të tretën herë, me synimin për të vazhduar punën në infrastrukturë, arsimin lokal dhe shërbimet publike.

“Jam mirënjohës për mbështetjen që kam marrë nga banorët e Vrapçishtit dhe angazhohem që t’ia kthej me punë, ndershmëri dhe përkushtim në çdo lagje dhe fshat,” – thuhet në një deklaratë të shkurtër të tij.

Isen Shabani është i martuar dhe baba i dy fëmijëve. Jeton në fshatin Gradec dhe mbetet një nga figurat më të qëndrueshme të qeverisjes lokale në rajonin e Gostivarit. Flaka