“Krofna gjigante” në qendër të Shkupit – mesazh gueril kundër korrupsionit

Pas Gostivarit dhe Strumicës, Shkupi ishte ndalesa e fundit e aksionit gueril në kuadër të projektit “Të rinjtë në Maqedoninë e Veriut: Hallkë kyçe në ndërtimin e një shoqërie pa korrupsion”.

Këtë herë, aktivistët vendosën një instalacion vizual në formën e një krofne gjigante – por me një mesazh të qartë: “Një e katërta e parave publike shpenzohen në mënyrë korruptive.”
Pjesa e munguar e krofnes simbolizon humbjet që korrupsioni ua shkakton buxhetit publik çdo ditë – mjete që në vend të arsimit, shëndetësisë apo infrastrukturës, përfundojnë në xhepa privatë.

Përmes këtij performansi kreativ dhe vizualisht të fuqishëm, qytetarët u ftuan të reflektojnë mbi pasojat reale të korrupsionit dhe të kërkojnë transparencë e llogaridhënie nga institucionet.

Aksioni u ideua dhe realizua në bashkëpunim me artistin vizual Nikola Pisarev nga Qendra për Art Bashkëkohor – Shkup, i cili kontribuoi në mesazhin origjinal dhe fuqinë estetike të veprës.

Projekti u mbështet nga Zivik Funding Programme i Ministrisë së Jashtme të Gjermanisë, përmes ifa – Institut für Auslandsbeziehungen, në partneritet me Analytica Think Tank, Organizatën e Grave nga Strumica dhe IGI Gostivar.

Me këtë ndërhyrje publike përmbyllet seria simbolike, por e fuqishme e aksioneve kreative që kishin për qëllim mobilizimin e të rinjve dhe opinionit publik në luftën kundër korrupsionit, shkruan Infomax.