BDI: Procesi i integrimit evropian është bllokuar – kjo u evidentua në Raportin e Komisionit Evropian

Bashkimi Demokratik për Integrim është deklaruar në lidhje me Raportin e Komisionit Evropian për Maqedoninë e Veriut për vitin 2025, për të cilin thonë se është dokumenti më kritik ndër vite dhe konfirmon regres të theksuar të vendit në procesin e integrimit evropian.

“Raporti thekson mungesë totale përparimi në sundimin e ligjit dhe në luftën kundër korrupsionit, ku korrupsioni i nivelit të lartë mbetet i pandëshkuar dhe ndikimi politik në gjyqësor vazhdon të jetë i pranishëm. Komisioni konstaton se institucione kyçe janë të paralizuara, zyrtarë publikë ndërhyjnë në organet e pavarura, ndërsa reformat në drejtësi kanë mbetur në letër”.

“Një ndër mesazhet më të rënda të raportit është se procesi i integrimit evropian është bllokuar nga vetë qeveria aktuale, e cila nuk ndërmori asnjë hap për ndryshimet kushtetuese të dakorduara me BE-në. Për pasojë, vendi nuk ka hapur asnjë kapitull të negociatave dhe nuk lëviz përpara drejt anëtarësimit”, thonë nga BDI.

“Raporti ngre alarme edhe për: rënie të standardeve demokratike dhe polarizim ekstrem politik, presion mbi mediat dhe mungesë të mbrojtjes së gazetarëve, dobësim të luftës kundër korrupsionit, përfshirë skandale me pasoja tragjike, ngecje në mbrojtjen e të drejtave të qytetarëve dhe në funksionimin e administratës”.

“BDI e konsideron këtë raport si dëshminë zyrtare të dështimit të qeverisë aktuale, e cila me paaftësinë, mungesën e vizionit dhe kapjen e institucioneve ka humbur mbështetjen e partnerëve ndërkombëtarë dhe ka kthyer vendin pas në procesin euro-atlantik”, thonë nga BDI.

Gjithashtu thonë se ata mbeten forca politike që e ka çuar vendin drejt NATO-s dhe ka hapur negociatat me BE-në.

“Ne do të ndërmarrim çdo hap institucional për të liruar procesin integrues nga bllokada e sotme dhe për t’i kthyer vendit orientimin e qartë evropian. Qytetarët nuk mjaftohen me deklarata patetike të Kryeministrit Mickoski “se ne jemi shumë përpara Shqipërisë në integrimin evropian”, e cila edhe po të jetë e vërtetë është meritë e qeverisej tonë paraprake që mori hapa vendimtar në zhbllokimin e integrimeve Euro-Atlantike. E ardhmja është në Bashkimin Evropian prandaj çdo vonesë është humbje për shtetin dhe për qytetarët”, thonë nga BDI.