Greqi-Turqi: Erdogan dhe Mitsotakis mund të takohen për tensionet në Egje
Botuar nga Drin Zenku
Në një takim të mundshëm të ardhshëm, në tryezë mund të jenë të pranishëm presidenti turk Rexhep Taip Erdogan dhe kryeministri grek Kyriakos Mitsotakis, me qëllim diskutimin e çështjeve të Detit Egje dhe bashkëpunimit ekonomik.
Që nga krijimi i Këshillit të Lartë të Bashkëpunimit në 2010, marrëdhëniet mes dy partnerëve të NATO-s kanë pasur përparime të kufizuara, megjithatë fokusimi i Këshillit ka qenë nxitja e një agjende pozitive, sidomos në ekonomi dhe turizëm. Takimi i fundit u mbajt në Athinë në dhjetor 2023.
Një pikë e re debati është përdorimi nga Turqia i sistemit Navtex, për të paralajmëruar aktivitetet ushtarake dhe rreziqet e sigurisë në Egje. Athina e sheh këtë si një përpjekje për zgjerim të ujërave territoriale, ndërsa Ankaraja e konsideron të ligjshëm.
Për dekada, Greqia dhe Turqia kanë pasur mosmarrëveshje për shelfin kontinental, shfrytëzimin e burimeve natyrore dhe zgjerimin e ujërave territoriale. Konventa e Kombeve të Bashkuara mbi të Drejtën e Detit (1982) është busulla ligjore, megjithëse Turqia nuk e ka nënshkruar. Marrëveshje dypalëshe për kufijtë ende nuk ka, dhe çdo zgjidhje e mundshme kërkon dakordësinë e të dyja palëve.
Ekspertët paralajmërojnë se, pa një marrëveshje të përbashkët, çështjet e Detit Egje mund të mbeten burim tensioni të vazhdueshëm, ndërsa Gjykata Ndërkombëtare e Drejtësisë në Hagë mund të ndërhyjë vetëm me kërkesë të palëve.
Flaka
Botuar nga Drin Zenku
TË fundit
