Marihuana e sekuestruar në Shkup dhe Strumicë vlerësohet gati 270 milionë euro
Botuar nga Flaka
Operacioni i fundit i policisë maqedonase në ish-kompleksin industrial OHIS në Shkup dhe në rajonin e Strumicës ka hyrë në histori si goditja më e madhe ndaj tregtisë së paligjshme të kanabisit në vend. Megjithatë, përtej shifrave marramendëse të tonelatave të sekuestruara, mbeten disa pyetje thelbësore pa përgjigje.
Sipas burimeve të ndryshme, janë konfiskuar nga 27 deri në 28 tonë marihuanë, ndërsa informacionet më të fundit flasin për një total që arrin deri në 40 tonë. Kanabisi ishte i regjistruar si “mjekësor”, por dyshohet se ishte devijuar sistematikisht drejt tregut të zi dhe kontrabandës rajonale, në një rrjet ku përfshihej edhe Serbia – vend ku vetëm pak ditë më parë u sekuestruan 5 tonë të lidhura me të njëjtën skemë.
Ajo që bie në sy është mungesa e një vlerësimi zyrtar për vlerën financiare të ngarkesës. Autoritetet flasin për “sasi enorme” dhe “rast të rëndë kriminal”, por shmangin përmendjen e shifrave monetare, ndonëse në raste të ngjashme rajonale këto zakonisht theksohen.
Bazuar në precedentët serbë, ku 5 tonë u vlerësuan 7–10 milionë euro, çmimi rajonal i kanabisit të devijuar nga licencat mjekësore sillet rreth 1.400–2.000 euro për kilogram. Me këtë logjikë, vetëm 27 tonë do të kishin një vlerë minimale prej rreth 54 milionë euro.
Por nëse e njëjta sasi do të kishte përfunduar në tregje të Bashkimit Evropian, ku çmimet me shumicë dhe në rrugë janë dukshëm më të larta, vlera mund të shkonte shumë më tej – deri në 200 apo edhe 270 milionë euro, në varësi të cilësisë dhe destinacionit final.
Kjo e bën rastin jo vetëm një histori të madhe policore, por edhe një pasqyrë alarmante të dobësive sistemike në kontrollin e industrisë së kanabisit mjekësor. Pyetja kryesore nuk është më sa tonë u sekuestruan, por sa gjatë dhe me dijeninë e kujt ky kanabis ka qarkulluar jashtë çdo kontrolli institucional.
Operacioni është shpallur sukses, por heshtja për përmasën reale ekonomike të skandalit lë hapësirë për dyshime: a kemi të bëjmë vetëm me një rrjet kriminal, apo me një dështim të thellë të mekanizmave shtetërorë të mbikëqyrjes? Gazeta Flaka
Botuar nga Flaka
TË fundit
