Përplasje LSDM–VMRO-DPMNE: Akuza për pasuri, tenderë dhe “standarde të dyfishta”

Botuar nga Flaka 7 Shkurt, 2026 11:43

Përplasjet politike mes LSDM-së, ZNAM-it dhe VMRO-DPMNE-së janë intensifikuar, me akuza të ndërsjella për pasuri të pajustifikuara, keqpërdorim të fondeve publike dhe standarde të dyfishta në politikat për sigurinë në komunikacion, përcjell Media Online Gazeta Flaka

Nga LSDM thonë se është paradoksale që ZNAM sulmon këtë parti, kur vetë lideri i saj, Maksim Dimitrievski, ka pranuar publikisht se nuk jeton vetëm nga paga që merr. Sipas LSDM-së, kjo është thjesht e vërteta e thënë publikisht dhe për këtë arsye nuk mund të fajësohen.

“Askush në koalicionin e tenderëve VMRO-DPMNE–ZNAM nuk jeton me pagën e tij, por në kurriz të qytetarëve. Kjo tashmë është e njohur për opinionin”, thuhet në reagimin e LSDM-së.

Partia opozitare akuzon këtë koalicion se me politikat e tij e ka shndërruar shtetin në biznes privat, duke shkaktuar, sipas tyre, një mungesë prej rreth dy miliardë eurosh në financat publike. Nga LSDM rikujtojnë se gjatë krizës së Covid-19 shteti u detyrua të marrë borxhe për të ndihmuar qytetarët dhe ekonominë, duke theksuar se ato masa janë marrë në interes të drejtpërdrejtë të qytetarëve.

Në të njëjtën kohë, LSDM akuzon VMRO-DPMNE-në dhe ZNAM-in për luks dhe keqpërdorim të parasë publike, duke përmendur si shembull tenderin prej 1.2 milionë eurosh për Postën e Maqedonisë, i cili, sipas tyre, iu dha një kompanie të afërt me ZNAM-in, ndërkohë që punonjësit e Postës kanë pritur pagat për muaj të tërë.

Nga ana tjetër, VMRO-DPMNE reagoi duke akuzuar LSDM-në dhe kryetarin e saj, Venko Filipçe, për standarde të dyfishta lidhur me projektin “Safe City”. Sipas kësaj partie, deputetët e LSDM-së në Kuvend kanë votuar kundër ligjeve që mundësojnë zbatimin e këtij projekti, edhe pse publikisht deklarojnë se janë kundër vozitjes pa leje drejtimi dhe shkeljeve të rënda në komunikacion.

VMRO-DPMNE thekson se projekti “Safe City” ka për qëllim rritjen e sigurisë në trafik, identifikimin dhe sanksionimin e shkelësve të ligjit, përfshirë personat që drejtojnë automjete pa leje drejtimi ose me automjete të paregjistruara.

Nga kjo parti shtojnë se gjatë periudhës kur LSDM ishte në pushtet nuk është realizuar asnjë projekt digjital për kontrollin dhe monitorimin e trafikut. Sipas VMRO-DPMNE-së, tani që po vendoset një sistem i ri për rend dhe siguri në komunikacion, kundërshtimi i LSDM-së ndaj ligjeve për “Safe City” dëshmon, siç thonë ata, qasje me standarde të dyfishta.

Debati politik vazhdon, ndërsa akuzat për pasuri, tenderë dhe projekte infrastrukturore mbeten në qendër të përplasjes mes pushtetit dhe opozitës. Gazeta Flaka

Botuar nga Flaka 7 Shkurt, 2026 11:43

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Marrja e paautorizuar e teksteve dhe videove me të drejtë autoriale ose ndonjë përmbajtje të ngjashme pa pëlqimin paraprak me shkrim të Flaka Media do të konsiderohet shkelje e të drejtave autoriale dhe për këtë Flaka e ruan të drejtën të kërkojë kompensim përkatës monetar.Mosrespektimi dhe abuzimi i të drejtave autoriale dhe të drejtave simotër dënohet me ligj.Çdo marrje e paautorizuar, shfrytëzim, përdorim apo publikim i tekstit, fotografitë ose videot apo çfarëdo përmbajtje tjetër e ngjashme që paraqet pronësi të Flaka Media, pa pëlqim paraprak me shkrim nga redaksua, ndalohet rreptësisht dhe për të njëjtën paguhet kompensim përkatës financiar, për çka pronari ka të drejtë të nis procedurë përkatëse.Në rast të marrjes së teksteve autoriale dhe videove apo çfarëdo përmbajtje tjetër, në mënyrë të obligueshme nevojitet pëlqim paraprak nga Flaka Media dhe vendosje të linkut që do të çojë deri në web faqen e Flaka Media. Shkrimet nga MGID, nuk janë në menaxhim të redaksisë.