Shkup: Alkool për të mitur, sulm brutal në Vizbegë dhe grabitje me armë në Bit Pazar

Fundjava e zgjatur në Shkup është shoqëruar me një sërë ngjarjesh shqetësuese nga kronika e zezë, që përfshijnë shkelje ligjore në lokale, dhunë në familje dhe sulme të armatosura ndaj bizneseve.

Gjatë periudhës 19–22 mars 2026, policia nga njësitë Aerodrom dhe Draçevë, në kuadër të SPB Shkup, ka realizuar kontrolle të përforcuara në lagjen Aerodrom. Janë kontrolluar 12 objekte hotelierike, ku në tre prej tyre janë konstatuar të mitur duke konsumuar alkool. Pas dokumentimit, priten kallëzime penale për veprën “Shërbimi i alkoolit për të miturit”.

Ndërkohë, një ngjarje e rëndë dhune është regjistruar në fshatin Vizbegë. Një 57-vjeçar me iniciale N.B. ka denoncuar se disa fqinj i kanë hyrë me forcë në shtëpi rreth orës 22:30, duke e sulmuar fizikisht. Sipas dëshmisë, njëri prej tyre e ka goditur disa herë në kokë me dorezën e një pistolete, ndërsa gjatë incidentit është shtyrë edhe djali i tij i mitur.

Po ashtu, mbrëmja ka qenë e tensionuar edhe në zonën e Bit Pazar, ku një person i armatosur ka realizuar tre sulme brenda më pak se një ore. Fillimisht, ai tentoi të grabisë një dyqan duke sulmuar fizikisht pronarin 61-vjeçar, më pas grabiti një bastore sportive dhe në fund tentoi një tjetër grabitje në një kazino, por pa sukses.

Nga SPB Shkup bëjnë të ditur se po ndërmerren masa intensive për identifikimin dhe kapjen e autorëve në të gjitha rastet. Gazeta Flaka