Ryshfet në kufi dhe mijëra shkelje në rrugë – MPB me bilanc shqetësues

Një polic kufitar nga vendkalimi Qafë Thanë është përballur me kallëzim penal për ryshfet dhe largim nga puna, ndërsa Ministria e Punëve të Brendshme publikoi edhe statistika shqetësuese për shkeljet në komunikacion, duke treguar përmasa të mëdha të mosrespektimit të rregullave rrugore në vend.

Sipas MPB-së, Departamenti i Kontrollit të Brendshëm ka dorëzuar kallëzim penal ndaj zyrtarit policor D.S., i dyshuar për veprën penale “marrje ryshfeti”. Dyshimet janë se ai kishte kërkuar para për të lejuar kalimin në kufi të një automjeti të evidentuar në sistem si i vjedhur dhe pa dokumentacionin e nevojshëm. Për rastin është iniciuar edhe procedurë disiplinore, ndërsa ndaj tij do të zbatohet masa e largimit nga puna deri në përfundimin e procedurës.

Ndërkohë, policia ka publikuar edhe bilancin e kontrolleve rrugore gjatë muajit të fundit. Nga 16.885 urdhërpagesa të shqiptuara, më shumë se 4.400 shkelje lidhen me tejkalimin e shpejtësisë, mbi 3.800 me parkim të parregullt dhe 920 me përdorimin e telefonit gjatë vozitjes.

Shqetësuese mbeten edhe shifrat për drejtimin pa patentë shoferi dhe nën ndikimin e alkoolit. Sipas MPB-së, janë sanksionuar 241 shoferë pa patentë, 70 për vozitje nën ndikimin e alkoolit dhe 33 persona që kishin ndalim të mëparshëm për drejtim automjeti. Në këtë periudhë janë sekuestruar edhe 238 automjete.

Autoritetet njoftojnë se kontrollet do të vazhdojnë edhe në ditët në vijim, duke apeluar për respektim më të madh të rregullave të komunikacionit dhe më shumë përgjegjësi nga të gjithë pjesëmarrësit në trafik. Gazeta Flaka