Kapet automjet me rreth 90 dërgesa pa dokumentacion në Shkup, arrestohen dy të rinj

Dy persona nga Shkupi janë privuar nga liria nga policia pasi gjatë një kontrolli në automjetin me të cilin po udhëtonin u gjetën rreth 90 dërgesa me mallra të ndryshme pa dokumentacion përkatës.

Sipas njoftimit të Ministrisë së Punëve të Brendshme, aksioni është realizuar mbrëmjen e kaluar në rrugën “Magjistralja e Adriatikut” në Shkup nga nëpunësit policorë të Njësitit Mobil për Masa Kompensuese pranë Departamentit për Çështje Kufitare dhe Migracion, në bashkëpunim me policinë e Njësisë Policore Mirkovc.

Gjatë kontrollit të automjetit të tipit “Ford” me targa të Shkupit, i drejtuar nga 19-vjeçari M.I., policia ka konstatuar se po transportohej një sasi e madhe mallrash të ndryshme pa dokumentacion adekuat. Sipas autoriteteve, në automjet u gjetën rreth 90 dërgesa me produkte të ndryshme, të paketuara në qese të zeza.

Po ashtu, kontrollet treguan se drejtuesi i automjetit nuk posedonte patentë shoferi të vlefshme të kategorisë B. Si pronar i automjetit është identifikuar 20-vjeçari E.Sh. nga Shkupi.

Pas zbulimit të parregullsive, të dy personat janë arrestuar dhe janë dërguar në stacion policor për procedura të mëtejshme.

MPB-ja njoftoi se ndaj shoferit M.I. do të parashtrohet kallëzim penal për drejtim automjeti pa patentë shoferi të vlefshme, në përputhje me nenin 297-a, paragrafi 2 të Kodit Penal.

Flaka