“Kafe me Ambasadorët” në Strumicë: Në fokus bujqësia dhe zhvillimi rural

Në Europe House në Strumicë u mbajt edicioni i radhës i “Kafe me Ambasadorët”, këtë herë i përkushtuar temës “Bujqësia dhe zhvillimi rural”, me pjesëmarrjen e ambasadores së Gjermanisë, Petra Dreksler, dhe ambasadores së Holandës, Ozlem Xhanel.

Në diskutim morën pjesë bujq, përfaqësues të sektorit akademik dhe organizatave joqeveritare nga rajoni, ndërsa në fokus ishin rëndësia e bujqësisë në ekonomitë evropiane, përvojat e Gjermanisë dhe Holandës dhe mundësitë që integrimi evropian mund t’u sjellë bujqve në Maqedoninë e Veriut.

Ambasadorja gjermane Petra Dreksler theksoi rëndësinë e zhvillimit të një bujqësie që kombinon produktivitetin me mbrojtjen e burimeve natyrore.

“Sfida është që të ruajmë produktivitetin e lartë, duke mbrojtur njëkohësisht tokën, ujin, biodiversitetin dhe mjedisin”, u theksua gjatë diskutimit.

Në kuadër të ngjarjes, vëmendje e veçantë iu kushtua Politikës së Përbashkët Bujqësore të Bashkimit Evropian (CAP) dhe ndikimit të saj praktik tek fermerët.

Pjesëmarrësit diskutuan mënyrën se si politikat e BE-së mbështesin prodhimin bujqësor, përcaktojnë standardet mjedisore dhe kontribuojnë në zhvillimin e komuniteteve rurale.

Ambasadorja holandeze Ozlem Xhanel ndau përvojat e Holandës lidhur me përdorimin e teknologjive dhe inovacioneve në bujqësi, duke vënë në pah rëndësinë e përshtatjes së sektorit me sfidat e reja.

Diskutimi u përqendrua edhe në bujqësinë e qëndrueshme dhe ndryshimet klimatike, si dhe në nevojën që fermerët të përshtaten me kushtet e reja pa humbur konkurrueshmërinë.

Një pjesë e rëndësishme e bisedës iu kushtua inovacioneve, përfshirë bujqësinë precize, teknologjitë e serrave, digjitalizimin, kërkimin shkencor dhe kooperativat bujqësore.

Strumica u veçua si një nga rajonet me potencial të rëndësishëm bujqësor në vend, falë tokës pjellore, traditës së zhvilluar në prodhimin e perimeve dhe pozitës së favorshme ndaj tregjeve rajonale.

Gjatë diskutimit u theksua se këto përparësi mund të zhvillohen më tej përmes njohurive, teknologjive, bashkëpunimit dhe qasjes në instrumentet evropiane të mbështetjes.

Ngjarja u përmbyll me diskutimin mbi të ardhmen e bujqësisë në Maqedoninë e Veriut, me fokus te inovacionet, praktikat e qëndrueshme, organizimi më i mirë i prodhuesve dhe mundësitë që ofron integrimi evropian.

“Kafe me Ambasadorët” është pjesë e aktiviteteve të Europe House, të cilat synojnë krijimin e hapësirave për dialog mbi politikat, përvojat dhe vlerat evropiane, si dhe rëndësinë e tyre për qytetarët dhe komunitetet lokale në mbarë vendin. Gazeta Flaka