Arbër Ademi: Nesër, sytë te Gjykata Kushtetuese – vendimi mund të jetë goditje e madhe për gjuhën shqipe

Sekretari i përgjithshëm i BDI-së, Arbër Ademi, ka ngritur shqetësimin për seancën e nesërme të Gjykatës Kushtetuese, ku pritet të shqyrtohet çështja e një rregulloreje të publikuar në Gazetën Zyrtare vetëm në gjuhën maqedonase.

Ademi thotë se kuadri ligjor është i qartë dhe se aktet e publikuara në Gazetën Zyrtare duhet të publikohen në dy gjuhë.

“Ligji për përdorimin e gjuhëve është i qartë: aktet që publikohen në Gazetën Zyrtare publikohen në dy gjuhë. Po ashtu, edhe Ligji për publikimin e ligjeve dhe rregullave dhe akteve të tjera në Gazetën Zyrtare përcakton të njëjtin detyrim”, ka shkruar Ademi.

Sipas tij, edhe Amendamenti V i Kushtetutës përcakton qartë statusin e gjuhëve zyrtare.

“Edhe Amendamenti V i Kushtetutës është i qartë”, thekson ai.

Ademi i është referuar edhe praktikës së mëparshme të Gjykatës Kushtetuese, duke argumentuar se kjo gjykatë në raste të caktuara ka vlerësuar edhe kushtetutshmërinë formale të akteve.

“Për më tepër, në një sërë vendimesh, Gjykata Kushtetuese ka theksuar rëndësinë e kushtetutshmërisë formale, madje duke shfuqizuar akte pikërisht për shkelje të tilla”, deklaron Ademi.

Ai vlerëson se vendimi i nesërm mund të ketë pasoja më të gjera për përdorimin e gjuhës shqipe në aktet zyrtare.

“Tani, nesër, Gjykata Kushtetuese do të shqyrtojë çështjen e një rregulloreje të publikuar në Gazetën Zyrtare vetëm në gjuhën maqedonase”, shkruan Ademi.

Sipas tij, nëse Gjykata Kushtetuese vendos të mos iniciojë procedurë për vlerësimin e kushtetutshmërisë dhe ligjshmërisë së këtij akti, kjo do të përbënte një precedent me pasoja për gjuhën shqipe.

“Nëse Gjykata vendos të mos iniciojë procedurë për vlerësimin e kushtetutshmërisë dhe ligjshmërisë së këtij akti, atëherë goditja ndaj gjuhës shqipe si gjuhë zyrtare do të jetë e madhe”, paralajmëron Ademi.

Ai argumenton se një vendim i tillë do të mund të krijonte hapësirë që edhe akte të tjera të publikoheshin vetëm në maqedonisht.

“Sepse, pas një vendimi të tillë, krijohet bazë që aktet në Gazetën Zyrtare të publikohen vetëm në maqedonisht dhe, megjithatë, të mbeten në fuqi, pavarësisht se ligji thotë në dy gjuhë”, shprehet ai.

Ademi e cilëson një skenar të tillë si të papranueshëm dhe në kundërshtim me Kushtetutën dhe ligjet.

“Një vendim i tillë do të ishte skandaloz, në kundërshtim me Kushtetutën dhe ligjin dhe, po të ndiqet kjo logjikë, do të ishte vërtet një rast për librin e rekordeve Guinness”, ka shkruar ai.

Në fund, Ademi ka bërë thirrje për vëmendje të shtuar ndaj seancës së nesërme.

“Prandaj po apelojmë sot, që nesër të mos jetë vonë. Nesër, sytë të gjithë te Gjykata Kushtetuese”, përfundon Ademi. Gazeta Flaka