Tetovë: Shtyhen dy pikat e kontestuara për partneritetin publiko-privat pas debateve dhe protestës

Këshilli i Komunës së Tetovës nuk i miratoi sot dy pikat e rendit të ditës që shkaktuan debate të ashpra, tensione dhe protestë në sallën e mbledhjeve. Bëhet fjalë për dy propozime që lidhen me projekte të partneritetit publiko-privat, përkatësisht ndërtimin e një kompleksi administrativ-komercial dhe ndërtimin e objektit komunal dhe stacionit të zjarrfikësve.

Pika e parë kishte të bënte me miratimin e studimit të fizibilitetit për partneritetin publiko-privat për ndërtimin e objektit administrativ-komercial të Komunës së Tetovës. Ndërsa pika e dytë parashihte nisjen e procedurës për dhënien e kontratës për projektimin, financimin, ndërtimin, pajisjen, menaxhimin dhe mirëmbajtjen e stacionit të zjarrfikësve dhe objektit komunal.

Të dyja pikat nuk janë tërhequr nga rendi i ditës, por janë shtyrë për një seancë të ardhshme. Ndërkohë, pritet të vazhdojë debati publik rreth projekteve dhe mënyrës së realizimit të tyre.

Gjatë mbledhjes, përfaqësuesit e opozitës shprehën kritika ndaj udhëheqësisë komunale, duke ngritur shqetësime për mënyrën se si planifikohet të shfrytëzohet prona publike. Ata e akuzuan pushtetin lokal për rrezikimin e interesit publik, ndërsa përmes pankartave dhe protestës kërkuan shtyrjen e pikave të kontestuara.

Çështja e partneritetit publiko-privat pritet të mbetet në qendër të debatit në Tetovë, ndërsa zhvillimet e ardhshme do të tregojnë nëse propozimet do të rikthehen në Këshill pas konsultimeve dhe debatit publik. /Flaka/