Taravari: Maqedonia e Veriut shumë shpejt do të hapë klasterin e parë me Bashkimin Evropian

Maqedonia e Veriut shumë shpejt do të hapë klasterin e parë me Bashkimin Evropian, është optimist ministri i Shëndetësisë dhe një nga liderët e “VLEN”, Arben Taravari në një intervistë për “360 gradë” në MRT1. I pyetur se cila është baza e optimizmit të shtuar të kryeministrit Hristijan Mickoski për BE-në, sidomos pas samitit të fundit në kuadër të Procesit të Berlinit, Taravari thotë se kanë pasur një bisedë të shkurtër për këtë temë, por detajet i lë të njoftohen nga kryeministri.

Taravari: “Ajo që më gëzon është se ai është i orientuar drejt Evropës dhe dëshiron që Maqedonia t’i fillojë negociatat sa më shpejt që të jetë e mundur, por natyrisht si kryeministër ai kërkon disa garanci se nuk kemi pengesa të tjera. Neve si vend na ndodh që në vitin 2018 që na premtohet se do të fillojmë negociatat, do të bëjmë lëshime të caktuara si vend dhe më pas nuk do t’i fillojmë. Unë jam ndër të paktët optimistë dhe vazhdoj të mendoj se Maqedonia do të fillojë negociatat me BE-në shumë shpejt”.

“360 gradë”: Ndër optimistët e rrallë në Qeveri?!

Taravari: “Jo, në shtet. Sepse shoh gjithnjë e më shumë njerëz që shfaqen – analistë dhe politikanë, sidomos nga opozita, të cilët thonë pa pushim se nuk ka mundësi, se gjithçka ka marrë fund. Unë vazhdoj të jem optimist se Maqedonia do të fillojë negociatat shumë shpejt”.

I pyetur se sa ka të bëjë me blerjen e kohës dhe përpjekjen për të zbutur goditjen nga fakti që Shqipëria doli përpara dhe vendi jo, Taravari përgjigjet se ka shanse që negociatat me BE të shkojnë paralelisht, edhe pse Shqipëria është një hap përpara Maqedonisë së Veriut.

“Nuk është mirë që u ndamë, por është mirë që filluan. Shqipëria nuk ka pse të qëndrojë me ne, megjithëse mendoj se pengesa për Shqipërinë ishte artificiale. I mbajtën deri sa mbaruan zgjedhjet këtu. Kryeministri Rama ishte shumë korrekt për Maqedoninë, se vërtet edhe Maqedonia e meriton të fillojë negociatat. Ai ishte edhe lider në atë kohë, madje që nga viti 2008 ka pasur rekomandime pozitive nga BE dhe gjithmonë ka një pengesë. Megjithatë, mendoj se nuk bëhet fjalë për të blerë kohë, duhet momentum, duhet një lloj garancie për shtetin dhe për të nisur negociatat. Shpresoj që negociatat me Shqipërinë të ecin paralelisht, jam shumë optimist për këtë dhe ende mendoj se të gjitha vendet e Ballkanit Perëndimor do të anëtarësohen në BE në të njëjtën kohë”, tha Taravari.

Për gjashtëmujorin në të cilin “VLEN” pret një plan qeveritar për tejkalimin e ngërçit, Taravari shprehet optimist, duke shtuar se periudha e treguar kalon në fund të vitit.

“Qëndrimi i Vlenit është se gjashtë muajt e parë janë për përshtatjen dhe sinkronizimin e qeverisë dhe se na duhet një periudhë për të parë situatën në vendet përreth, konkretisht në Bullgari ka zgjedhje, kështu që duhet të presim një qeveri të qëndrueshme përfundimisht, megjithëse unë jam një skeptik. Megjithatë, pas kësaj duhet të kemi një plan veprimi dhe të dimë se si do të zgjidhet dhe çfarë do të bëhet. Unë jam optimist, Qeveria ka gjashtë muaj deri në Vitin e Ri, jam optimist, fat të mirë dhe të fillojmë procedurën e negociatave me BE-në”, ka shtuar Taravari.

Për sa do të ndikojë koha e zgjedhjeve lokale të vitit të ardhshëm, Taravari thotë se ka mundësi të ketë ndikim, por më e rëndësishme sipas tij është që shteti të fillojë negociatat.

Taravari: “Të ketë mjete të aksesueshme me të cilat mund të ketë investime, të ketë projekte infrastrukturore që objektivisht do t’i ndihmojnë shtetit, e jo disa për qind që mund të humbasin në mbështetjen e qytetarëve, e kam fjalën konkretisht për partitë maqedonase. Megjithatë, duke marrë parasysh atë që po ndodh me opozitën maqedonase, mendoj se VMRO-DPMNE është në një avantazh të madh, gjë që nuk është e mirë për demokracinë, duhet të ketë një opozitë të fortë për të pasur një qeveri të fortë”. FLAKA