“Sabër”, mesazhi i Meidanit pas reagimit të Zekirja Ibrahimit për provimin e jurisprudencës

Pas reagimit publik të Zekirja Ibrahimit lidhur me provimin e jurisprudencës dhe statusin e gjuhës shqipe në RMV, ambasadori i Shqipërisë në Shkup, Denion Meidani, ka dhënë një përgjigje indirekte, por domethënëse, përmes një mesazhi të shkurtër: “Sabër”.

Postimi i Meidanit është interpretuar si thirrje për maturi, durim dhe mosnxitim në deklarata publike, duke aluduar në stilin e reagimeve të shpeshta dhe të drejtpërdrejta të Ibrahimit, përfaqësues i koalicionit VLEN.

Zekirja Ibrahimi, në reagimin e tij, kishte shkruar se “ra provimi i jurisprudencës e u pamë”, duke shtuar se për vite me radhë institucionet kanë mashtruar lidhur me statusin real të gjuhës shqipe dhe se provimi i jurisprudencës nuk është mbajtur në shqip për gati dy dekada.

“Asnjëherë nuk është vonë për ta kuptuar të vërtetën,” kishte shkruar Ibrahimi, duke vënë në pikëpyetje edhe reagimet e vonuara institucionale.

Ndërkohë, pa hyrë drejtpërdrejt në polemikë, ambasadori Meidani ka zgjedhur një qasje simbolike.

“Sabër,” ishte mesazhi i vetëm i tij, i lexuar nga opinioni si apel për qetësi, maturi politike dhe shmangie të deklaratave të nxituara që, sipas kritikëve, shpesh e karakterizojnë diskursin e Ibrahimit.

Reagimi i Meidanit vjen në një klimë të tensionuar debati publik rreth të drejtës për mbajtjen e provimit të jurisprudencës në gjuhën shqipe, çështje që ka hapur përplasje politike dhe reagime të forta nga aktorë të ndryshëm institucionalë dhe partiakë.Gazeta Flaka