Çair, qytetarë, të rinj dhe institucione bashkohen për një mjedis më të pastër
Me pjesëmarrje të gjerë të qytetarëve, të rinjve dhe përfaqësuesve të institucioneve, sot në territorin e Komunës së Çairit u realizua aksioni ekologjik “Dil dhe bashkangjitu!”, me aktivitete për pastrimin dhe mirëmbajtjen e hapësirave publike dhe të gjelbra.
Në aksion u përfshinë punonjës të institucioneve dhe ndërmarrjeve publike, vullnetarë të Kryqit të Kuq, nxënës, të rinj dhe qytetarë, të cilët vepruan në disa pika të komunës. Një nga drejtimet e aksionit nisi nga objekti i Komunës së Çairit dhe vazhdoi drejt Parkut të Çairit, duke përfshirë pastrimin e hapësirave përgjatë këtij segmenti dhe brenda parkut.
Aktiviteti bashkoi gjenerata të ndryshme rreth një qëllimi të përbashkët – një Çair më të pastër dhe më të rregulluar, duke përcjellë njëkohësisht mesazhin se mbrojtja e mjedisit dhe kujdesi për hapësirat publike kërkojnë angazhim të vazhdueshëm dhe përgjegjësi të përbashkët.
Komuna e Çairit do të vazhdojë të mbështesë dhe promovojë iniciativa që nxisin ndërgjegjësimin ekologjik dhe përfshirjen aktive të qytetarëve në kujdesin për mjedisin ku jetojmë.












