Policia jep detaje për vrasjen në Tetovë: Një i vdekur, katër të plagosur, mes tyre një vajzë e mitur

Sot (10.08.2025), rreth orës 12:30, në kryqëzimin e rrugëve “Ilindenska” dhe “Blagoja Toska” në Tetovë ka ndodhur një përleshje me armë mes personave nga dy automjete, gjatë së cilës ka ndodhur edhe një aksident trafiku, transmeton Flaka Media. Të dy automjetet më pas janë larguar nga vendngjarja, njëri duke shkuar në rrugën “113”, ndërsa tjetri në drejtim të panjohur.

Sipas informacioneve nga qytetarët dhe dëshmitarët, automjeti që është parë duke lëvizur drejt rrugës “113” ka qenë një Ford Fiesta me targa të Tetovës. Nga verifikimi është konstatuar se targat janë të çregjistruara dhe se automjeti është në pronësi të E.M. (19) nga fshati Gajre, Tetovë.

Gjatë ndërmarrjes së masave, në kryqëzimin e rrugëve “Blagoja Toska” dhe “107” është gjetur një automjet Volkswagen Golf me targa të Tetovës, pronë e F.R. (46) nga Tetova. Brenda tij është gjetur një person i pajetë me plagë nga armë zjarri.

Për rastin është formuar një ekip hetimor i udhëhequr nga prokurori kujdestar pranë Prokurorisë Publike – Tetovë dhe ekipi i ekspertizës nga SPB Tetovë. Aktualisht po kryhet ekspertiza në vendngjarje.

Nga të shtënat janë plagosur gjithsej katër persona:

• Një vajzë e mitur nga Tetova, e plagosur nga armë zjarri, e cila po mbahet nën vëzhgim në Spitalin Klinik të Tetovës.
• Dy persona, O.O. (34) dhe R.T., të cilët janë dërguar me urgjencë në Kompleksin Klinik “Nënë Tereza” në Shkup.
• Një kalimtar i rastit, A.S. (60) nga Tetova, i plagosur nga të shtënat, gjithashtu i dërguar në klinikat e Shkupit.

Policia thotë se po ndërmerren masa për zbardhjen e plotë të rastit. Flaka Media