Riorganizim i administratës shtetërore: më pak drejtues dhe bashkim i institucioneve

Ministria e Administratës Publike po përgatit një ligj të ri për organizimin dhe funksionimin e administratës shtetërore, me të cilin synohet racionalizimi i strukturës institucionale dhe ulja e numrit të pozitave drejtuese.

Ministri i Administratës Publike, Goran Minçev, bëri të ditur se masat e deritanishme të racionalizimit kanë sjellë rreth 300 mijë euro kursime në buxhet, pas heqjes së disa pozitave drejtuese.

Një nga pikat kryesore të ligjit të ri do të jetë analiza e mbivendosjes së kompetencave ndërmjet institucioneve shtetërore. Sipas Minçevit, aty ku dy ose më shumë institucione kryejnë detyra të njëjta apo të ngjashme, do të shqyrtohet mundësia e bashkimit të tyre.

Një proces i tillë mund të nënkuptojë edhe shfuqizimin e pozitave të caktuara të drejtorëve dhe zëvendësdrejtorëve, me synimin për të krijuar një administratë më të racionalizuar dhe për të reduktuar shpenzimet.

Minçev përmendi edhe raste ku një institucion ka drejtor, anëtarë të bordit drejtues dhe vetëm një të punësuar, ndërsa aktivitetet e tij janë të njëjta ose të ngjashme me ato të një institucioni tjetër.

Për miratimin e ligjit kërkohet shumicë prej dy të tretash në Kuvend, ndërsa para procedurës përfundimtare pritet të zhvillohen debate publike me partitë politike, organizatat joqeveritare dhe komunitetin ekspert.

Synimi i deklaruar i reformës është që struktura e administratës shtetërore të përshtatet me nevojat reale të institucioneve, duke shmangur dyfishimin e funksioneve dhe shpenzimet e panevojshme. Gazeta Flaka