Siljanovska Davkova tregon se çka i mungon Botës

Presidentja e Maqedonisë së Veriut, Gordana Siljanovska-Davkova, ka bërë një deklaratë të fortë për gjendjen e botës, duke thënë se sot mungojnë ligji, drejtësia, morali dhe etika.

Në një takim me anëtaret e Këshillit për Sipërmarrjen e Grave në Manastir, Siljanovska-Davkova tha se me “idealizëm” nuk nënkupton utopinë, por respektimin e parimeve dhe vlerave themelore.

Sipas saj, bota po udhëhiqet gjithnjë e më shumë nga ajo që quhet realpolitikë, ndërsa pasojat e saj i cilësoi si “darvinizëm”.

“Mëkati nuk bëhet vetëm duke vepruar, por edhe me mosveprim, duke shikuar. Nesër dikush do të pyesë se ku ishit kur ndodhnin këto gjëra”, tha presidentja.

Duke folur për konfliktet dhe krizën globale, ajo përmendi luftën në Ukrainë, situatën në Gaza dhe tensionet në Ngushticën e Hormuzit. Sipas saj, pasojat e konflikteve nuk përfundojnë me përplasjet në terren, por lënë pasoja afatgjata te njerëzit dhe shoqëritë.

Siljanovska-Davkova vlerësoi se diplomacia kulturore dhe parandaluese duhet të ketë një rol më të madh në përpjekjet për tejkalimin e krizave.

“Diplomacia kulturore është më e frytshme, më e fortë dhe më humane se diplomacia tradicionale. Diplomacia paqësore ose parandaluese është më e mirë se diplomacia reaktive”, tha ajo.

Në takim u diskutua edhe për rolin e grave në shoqëri dhe sipërmarrje, si dhe për sfidat me të cilat përballen ato në një mjedis global gjithnjë e më kompleks.

Në takim morën pjesë edhe kryetari i Komunës së Manastirit, Toni Konjanovski, dhe kryetari i Këshillit të Komunës, Bojan Bojkovski. Gazeta Flaka