Tetovë, në vend të çerdheve të reja, duan më shumë fëmijë në të njëjtat grupe – Amiti: Po mbingarkohen çerdhet ekzistuese

Në vend që të zgjerohet kapaciteti i çerdheve me objekte të reja dhe investime, në Këshillin e Komunës së Tetovës është propozuar rritja e numrit të fëmijëve në grupet ekzistuese të çerdheve.

Kundër këtij propozimi ka reaguar këshilltarja komunale nga radhët e AKI-së dhe ASH-së, Belinda Amiti, e cila ka kërkuar që pika për rritjen e numrit të fëmijëve të hiqet nga rendi i ditës.

Amiti tha se në Tetovë ekziston një kërkesë e madhe për regjistrimin e fëmijëve në çerdhe, por, sipas saj, mungesa e kapaciteteve nuk duhet të zgjidhet duke mbingarkuar grupet ekzistuese.

“Në Tetovë ka kërkesë shumë të madhe për regjistrim të fëmijëve nëpër çerdhe. Mirëpo, nga mungesa e kapaciteteve apo investimeve, në vend që të ndërtohen çerdhe të reja, propozohet të rritet numri i fëmijëve që mund të jenë në një grup”, deklaroi Amiti.

Ajo iu referua edhe Ligjit për Mbrojtjen e Fëmijëve, konkretisht nenit 64, i cili përcakton numrin e fëmijëve në grup në varësi të moshës. Për shembull, ligji përcakton nga 15 deri në 18 fëmijë për moshën mbi tre deri në katër vjeç, 18 deri në 20 për moshën mbi katër deri në pesë vjeç dhe 20 deri në 25 për moshën mbi pesë deri në gjashtë vjeç.

Ligji parashikon mundësi për përjashtim, por për grupet në institucionet publike kjo bëhet me pëlqimin e themeluesit.

Ndërkohë, Kolektivi i Marrëveshjes për institucionet publike për fëmijë përcakton normativat e fëmijëve në grupe dhe parashikon mundësi për rritjen e numrit mbi normativën ligjore. Neni 47 i marrëveshjes së vitit 2022 parashikon gjithashtu të drejtën e punonjësve për shtesë page kur themeluesi rrit numrin e fëmijëve mbi numrin e paraparë.

Çështja e numrit të fëmijëve në grupe ishte trajtuar edhe nga Gjykata Kushtetuese gjatë periudhës së pandemisë. Në lëndën U.br.121/2021, Gjykata shqyrtoi një iniciativë që kundërshtonte rritjen e numrit të fëmijëve në grupe nga 21 në 25. Gjykata vendosi të mos ngrejë procedurë, duke vlerësuar se neni 64 i ligjit lejon përjashtime dhe duke theksuar se marrëveshja kolektive parashikon rritje ose ulje deri në 20%.

Por, sipas Amitit, çështja qëndron te mënyra se si po trajtohet problemi i mungesës së vendeve në çerdhe.

“Kërkesa ishte pa numra të caktuar, vetëm rritje të numrit të fëmijëve. Kjo nuk është zgjidhje për mungesën e kapaciteteve. Zgjidhja duhet të jetë ndërtimi i çerdheve të reja dhe investimi në kapacitete të reja, e jo mbingarkimi i atyre ekzistuese”, tha Amiti.

Debati në Këshillin e Tetovës kështu rikthen në fokus pyetjen nëse mungesa e vendeve në çerdhe duhet të zgjidhet përmes zgjerimit të kapaciteteve infrastrukturore, apo përmes rritjes së numrit të fëmijëve brenda grupeve ekzistuese. Gazeta Flaka