Vdekje në rrethana të pasqaruara, arrestime, aksidente dhe zjarre në Maqedoninë e Veriut

Autoritetet policore në vend kanë raportuar një sërë ngjarjesh kriminale, aksidente trafiku dhe incidente të tjera që ndodhën gjatë 24 orëve të fundit në disa qytete të Maqedonisë së Veriut.

Arrestime për drogë, kërcënime dhe dokumente të falsifikuara
Policia e Kumanovës ka ngritur padi penale ndaj një 21-vjeçari nga qyteti për prodhim dhe shpërndarje të paautorizuar të narkotikëve, pasi gjatë një kontrolli në shtëpinë e tij u gjetën marijuanë dhe amfetaminë.
Ndaj një 48-vjeçari nga Kriva Pallanka u ngrit kallëzim penal për “kërcënim”, pasi kishte kanosur një punonjës kazinoje.
Ndërkohë, një shtetas turk është kallëzuar në kufirin “Deve Bair” për përdorim të një karte të falsifikuar ndërkombëtare të sigurimit.

Zbulim trupi i pajetë dhe plagosje në zjarre
Në fshatin Lozanovë të Krivë Pallankës është gjetur një trup i pajetë pranë një zjarri pyjor.
Një 19-vjeçar nga Zveçani, gjatë përpjekjes për të shuar një zjarr në fshatin Ramne të komunës së Makedonski Brod, pësoi lëndime trupore.

🔹 Aksidente të rënda rrugore
Një aksident tragjik ndodhi në rrugën Ohër–Kërçovë, ku një 83-vjeçar nga Ohri humbi jetën pas përplasjes së automjetit të tij me një makinë me targa shqiptare.
Në një tjetër aksident pranë fshatit Neokazi në Probishtip, tre persona u plagosën, përfshirë një 68-vjeçar që mori lëndime të rënda.
Në Gostivar dhe Bitola, dy këmbësorë dhe një motoçiklist pësuan lëndime të rënda në aksidente të ndara.
Në Radovish, një 14-vjeçar humbi kontrollin mbi motoçikletën dhe u plagos rëndë, ndërsa në Strumicë, një 30-vjeçar që drejtonte biçikletë doli nga rruga.

Sulme fizike dhe konflikte në Shkup
Policia e Shkupit ka regjistruar disa raste të dhunës fizike në lagjet Bit Pazar, Çair, Gjorçe Petrov, Aerodrom dhe Kisella Vodë. Në të gjitha rastet janë duke u ndërmarrë masa për zbardhjen e rrethanave.

Zjarre në automjete dhe objekte
Një veturë “BMW” është djegur para një shtëpie në Saraj – nuk raportohet për të lënduar.
Një zjarr tjetër shpërtheu në një automjet të Ministrisë së Punëve të Brendshme në qendër të Shkupit. Dy policë kërkuan ndihmë mjekësore pas thithjes së tymit.

Vdekje në rrethana të pasqaruara
Në lagjen Gjorçe Petrov u gjet i vdekur një 48-vjeçar pa shenja dhune. Rasti po hetohet nga autoritetet.

Policia ka theksuar se po vazhdon me hetime të detajuara për të gjitha rastet dhe do të ndërmerren masat e duhura ligjore. Flaka