Prokuroria: Erdgys Arrazi po hetohet për shkaktim të vetëvrasjes së Almës

Prokuroria e Shkodrës ka regjistruar çështjen ndaj Erdgys Arrazit, i cili do të hetohet për veprën penale të “Shkaktimit të vetëvrasjes” për shkak të dhunës psikologjike të ushtruar në mënyrë të vazhdueshme ndaj bashkëshortes, Alma Arrazi.

Prokuroria e Shkodrës thotë se bazuar në prova, “Erdgys Arrazi, si rrjedhojë e dhunës psikologjike të vazhdueshme ndaj bashkëshortes së tij, shfaqur në formën e ofendimeve të vazhdueshme dhe tradhtisë bashkëshortore, duke prekur rëndë dinjitetin e saj, ka shkaktuar vetëvrasjen e shtetases A.A., e cila në gjendje të rënduar psikologjike dyshohet të jetë hedhur në lum bashkë me tre fëmijët e mitur”.

Sipas prokurorisë denoncimi nga ana e Erdgys Arrazi për largim nga banesa të gruas dhe fëmijëve të tij është bërë më 3 maj, orës 17:30 ku ai është paraqitur në Komisariatin e Policisë Shkodër.

“Pas denoncimit janë pyetur familjarët dhe të afërmit ku dhe nga pamjet e kamerave të sigurisë është parë që në datën 02.05.2024, pasdite, Alma Arrazi me fëmijët e mitur, ka shkuar për të pirë kafe me kunatën V.P., në lagjen “Iliria” Shkodër. Aty kanë qëndruar për rreth dy orë dhe më pas kanë dalë jashtë, ku Alma Arrazi i ka thënë shtetases V.P. se do ta merrte prej aty vëllai i saj me taksi, pasi do shkonte një jave tek shtëpia e tij që të qetësohej. Më pas është ndarë nga kunata, ku shtetasja A.A. bashkë me tre fëmijët, ka ecur në trotuarin e rrugës që të çon te “Ura e Bunës” së vjetër, në drejtim të “Kishës së Zojës”, Shkodër. Alma Arrazi së bashku me 3 fëmijët e saj, duke vazhduar rrugën në drejtim të “Urës së Bunës”, në anën perendimore, ndërsa kunata e saj vazhdon nga ana lindore. Dalja nga lokali është në orën 20:10 të datës 02.05.2024”, sqaron prokuroria.

Një ditë më pas më 4 maj rreth orës 22:00, policia është njoftuar se është gjetur trupi i pa jetë i një fëmijë të mitur, në anë të lumit Buna në fshatin Darragjat, identifikuar si shtetasja Ergesa Arrazi 9 vjeç.

“Është bërë këqyrja e kufomës së shtetases E.A. në prani të mjekut ligjor, ku nga kqyrja e jashtme nuk janë konstatuar shenja dhune. Është vendosur kryerja e ekspertimit mjeko-ligjor për shtetasen E.A., me qëllim përcaktimin e dëmtimeve që konstatohen në trupin e viktimës dhe përcaktimin e shkakut të vdekjes. Nga ana e policisë gjyqësore është ushtruar kontroll banese shtetasit E.A., ku nuk janë konstatuar sende të paligjshme”, thuhet në njoftimin e prokurorisë.

Vijojnë hetimet me qëllim këqyrjen e të gjitha pamjeve filmike të kamerave përreth vendit të ngjarjes me qëllim zbulimin e itenerarit të Alma Arrazit dhe fëmijëve të mitur me qëllim për të grumbulluar të dhëna të nevojshme lidhur me zbardhjen e plotë të rrethanave të ngjarjes së rëndë.