Hansi Flik ka firmosur, gati prezantimi si trajneri i ri i Barcelonës

Pas një të marte plot tension, pritet që këtë të mërkurë, më 29 maj, të inaugurohet një “skenë” e re te Barça. Gjermani Hansi Flik do të shpallet zyrtarisht si trajneri i ri i Barçës, pasi presidenti i klubit të mbyllë përfundimisht largimin e Çavi Hernández.

Sezoni zyrtar i klubit blaugrana përfundoi të dielën, me fitoren e parëndësishme në “Sánchez-Pizhuán”, pasi vendi i dytë në La Liga ishte siguruar tashmë. Në klubin katalanas tashmë po punojnë 100% mbi planifikimin sportiv për sezonin e ardhshëm. Tani e tutje, Hansi Flik do të punojë së bashku me Deko de Souza, drejtorin sportiv, për të ndërtuar skuadrën e re.

Sipas “AS”, Çavi Hernández ka refuzuar një propozim për të qenë trajner i kombëtares së Koresë së Jugut. Në derën e trajnerit katalanas kanë trokitur edhe Ajaksi, Man. Junajted e Milani. Ideja e tij, siç është shprehur në disa raste, është të bëjë një pushim dhe më pas të vlerësojë opsionet që ka për të vazhduar të stërvisë diku tjetër.