Dybala tregon se si ishte afër lëvizjes te Man Utd dhe si vendosi të mos shkojë

Ylli i Romës, Paulo Dybala, zbulon se e refuzoi një lëvizje te Manchester United në vitin 2019, kur luante për Juventusin, pasi kishte biseduar me Maurizio Sarri.

Dybala ka dhënë një intervistë të gjatë për The Athletic, duke folur për karrierën dhe planet e tij për të ardhmen.

Argjentinasi është tashmë një legjendë e Serie A me 123 gola në 324 paraqitje në ligë me Palermon, Juventusin dhe Romën.

Ai ishte afër largimit nga Italia në vitin 2019 kur Juventusi ishte në bisedime me Manchester United për një marrëveshje shkëmbimi që përfshin argjentinasin dhe Lukakun.

“Atë verë, mbaj mend që kishte një qasje nga Manchester United dhe Tottenham, por ishte më shumë Manchester sepse Juve donte ta bënte atë lëvizje”.

“Ishte sezoni kur Juve emëroi (Maurizio) Sarri, kështu që fola me të për të zbuluar nëse ai me të vërtetë nuk më donte në ekip. Pas bisedës sonë, qëllimi im ishte të qëndroja. Nuk doja të largohesha. Doja të qëndroja sepse isha i lumtur (në Torino). Ky ishte viti im më i mirë”, ka treguar Dybala.

Ai u largua nga Juventusi tre vjet më vonë kur gjigantët e Serie A refuzuan t’ia zgjasin kontratën, duke u bashkuar me Romën si transferim i lirë. /Telegrafi/