Ramadani: Krenar për kombëtaren dhe vendin tim, të vazhdojmë kështu për të ardhmen
Ylber Ramadani, mesfushori shqiptar që luan me Lecce në Serie A, foli për “Uefa.com” pas humbjes 1-0 kundër Spanjës, e cila vulosi eliminimin e kombëtares së tij nga “Euro 2024”: “Bëmë gjithçka, sidomos pjesën e dytë, për të marrë diçka nga kjo ndeshje, por ishim të pafat në disa momente. Ndihem krenar për skuadrën time, për atë që bëri sonte dhe në këtë kompeticion.
Nuk ishte e lehtë të luanim kundër Spanjës, e cila aplikoi ‘9 fals’ në sulm. Ata ishin gjithmonë pas meje, kështu që nuk e para aspak të lehtë. Jam krenar për ekipin tim, për vendin tim, për atë që bëmë në këtë turne. Kemi luajtur futboll të mirë, kemi treguar kulturë në tribuna, në qytete, kështu duhet të vazhdojmë përgjithmonë në të ardhmen”.