Gjiganti i Premier Ligës gati të firmos me portierin e Portugalisë

Diogo Kosta ka shkëlqyer në “Euro 2024”, sidomos në sfidën mes Portugalisë dhe Sllovenisë. Portieri portugez ka bërë pritje të jashtëzakonshme gjatë lojës, derisa në penallti priti tre të tilla për t’i siguruar portugezëve një vend në çerekfinale. Falë paraqitjeve të shkëlqyera në “Euro 2024”, Kosta pritet të bëjë hapin e madh në karrierë për tu larguar nga Porto gjatë verës.

E ardhmja e portierit duket se do të jetë në elitën e futbollit anglez në Premier Ligë, ku Çellsi është favoriti kryesor për të nënshkruar me portierin e Portos. Në fakt për të arritur deri te Diogo Kosta, londinezët do të duhet të paguajnë klauzolën e lartë të tij.

24-vjeçari produkt i Akademisë së Portos ka një klauzolë largimi prej 75 milionë eurove dhe Çellsi është gati ta paguajë atë. Portieri shtatëlartë në sezonin e fundit ka zhvilluar 45 ndeshje me Porton ku në 17 prej tyre ka mbajtur portën e paprekur.