Braziliani mendon largimin në janar

Real Madridi ka vënë sërish “bast” për një lojtar brazilian, pas Rodrygo dhe Vinicius, duke blerë Endrick për 35 milionë euro, plus 25 milionë bonuse.

Futbollisti e dinte, siç raporton “Sport”, se në Spanjë, me “Los Blancos” gjërat nuk do të ishin të thjeshta.

Tashmë ka filluar të kuptojë se gjetja e hapësirës te Merenguesit është vërtet e ndërlikuar. Brahim Diaz dhe Arda Guler janë gjithashtu para tij në hierarkitë e trajnerit Ancelotti.

Trajneri italian nuk i ka dhënë ende asnjë minutë në dy ndeshjet zyrtare dhe ky aspekt nuk i ka pëlqyer shumë djaloshit brazilian, i cili ka nisur të mendojë për të ardhmen e tij. Në fakt duket se ai po shqyrton mundësinë e huazimit në janar, nëse nuk do të luajë aq sa shpresonte deri në sesionin e radhës të merkatos. 18-vjeçarit i duhen minuta për t’u rritur, maturuar dhe fituar përvojë në futbollin europian.

Në karrierën e tij krenohet me 16 paraqitje dhe 9 gola te Palmeiras U-20 dhe 82 ndeshje e 21 gola me Palmeiras. Ai tashmë ka debutuar me Brazilin, me të cilin ka luajtur 10 herë, duke shënuar edhe 3 gola. Pavarësisht moshës së tij të re, Endrick ka fituar tashmë një Superkupë Brazili, dy kampionate braziliane dhe një Superkupë Europiane si profesionist.