Pse VMRO ndryshoi qëndrim për Korridorin 8?

Kur Mickoski ishte në opozitë, nisjen e projektit për Korridorin 8 nga qeveria e kaluar, e kishte quajtur  “projekt kriminel”. Ndërkaq, tani kur është në pushtet, ndryshoi qëndrime dhe ditë më parë tha se ky është një moment veçanërisht i rëndësishëm, sepse pas dy vitesh bisedime dhe premtime boshe, më në fund mund të shihet diçka që duhet të jetë pjesë e ëndrrës së tyre si Qeveri. Nga LSDM-ja opozitare, përmes një kumtese theksojnë se Mickoski ka ndryshuar qëndrim pasi është ulur në kolltukun e kryeministrit

Gjatë kohës sa ishte në opozitë VMRO-DPMNE, pati kundërshtuar zëshëm ndërtimin e Korridorit 8 dhe 10d deri sa e quajti edhe projekt kriminal. Tani për ministrin e Transportit dhe Lidhjeve, Aleksandar Nikolloski, ky është projekti më i madh në historinë e re. Kryeministri Hristijan Mickoski thotë se ajo që ishte iluzion tani është e vërtetë, sepse po bëhet në terren. Nikolloski pas inspektimit ku kanë vazhduar punimet ndërtimore, tha se nga Shkupi në Ohër do të duhet një orë e gjysmë pasi të jetë gati autostrada.  Kjo trase është pjesë e Korridorit 8, i cili po ndërtohet nga konsorciumi “Bechtel dhe Enka”, ndërtimi i të cilit ka ngecur prej dy vitesh për shkak të shpronësimit të tokës.

Veprimtaritë ndërtimore, përveç Nikollovskit, i inspektuan edhe kryeministri Hristijan Mickoski, Izet Mexhiti, përfaqësues tjerë nga Qeveria dhe ambasadorja e SHBA-së, Angela Aggeler.  Për Mickoskin ky është një moment veçanërisht i rëndësishëm, sepse siç tha ai, pas dy vitesh bisedime dhe premtime boshe, më në fund mund të shihet diçka që duhet të jetë pjesë e ëndrrës së tyre si Qeveri.

“Dhe sikur vendi ynë është shteti pritës i tre kryqëzimeve”. Dhe është një kryqëzim transporti, hekurudhor dhe energjetik. Kjo është ëndrra jonë. Kjo është ëndrra ime personale dhe si kryeministër do të bëj gjithçka për ta bërë realitet”, tha kryeministri Hristijan Mickoski.

Për zëvendëskryeministrin Izet Mexhiti, me vazhdimin e ndërtimit mbyllet tema e Korridorit 8 si temë politike. “Korridori 8 është prioritet mbi prioritetet për zhvillimin e vendit, për zhvillimin ekonomik dhe nuk kam fare dyshim se ‘Bechtel dhe Enka’ do të vijnë javën e ardhshme dhe do të jemi dëshmitarë të realizimit të projektit”, tha Mexhiti.

Në konferencën për media, BDI është shprehur e kënaqur që po vazhdon ndërtimi i korridoreve 8 dhe 10d. “Kjo vetëm konfirmon qasjen tonë të qëndrueshme vizionare dhe politikat afatgjata për përparimin e vendit dhe ndërtimin e infrastrukturës rrugore moderne”, potencuan nga BDI.

Në tetor të vitit të kaluar, zëvendëskryeministri i parë dhe koordinatori për ndërtimin e korridoreve 8 dhe 10D, Artan Grubi, deklaroi se shteti nuk i ka paguar asnjë gjobë konsorciumit “Bechtel dhe Enka” për ndërtimi i seksioneve të korridoreve 8 dhe 10D. Ai kërkoi që deputetët e VMRO-DPMNE-së t’i bëjnë thirrje qytetarëve që të aplikojnë për vendet e punës që kërkon konsorciumi “Bechtel dhe Enka” për ndërtimin e katër autostradave në vend.

Nga LSDM-ja opozitare, përmes një kumtese theksojnë se Mickoski ka ndryshuar qëndrim pasi është ulur në kolltukun e kryeministrit. “Kur ishte në opozitë, Mickoski me zë të lartë e shpalli “krim historik” marrëveshjen me “Bechtel dhe Enka” dhe pretendoi se ishte “kontestuese në të gjitha bazat”. Epo, pasi u ul në karrigen e kryeministrit, Mickoski ndërroi korsinë brenda natës. Tani papritmas Mickoski e lavdëron me të njëjtën kontratë me “Bechtel dhe Enka”, me krenari thotë se është mirë për vendin, tregon se sa të rëndësishme kanë qenë projektet për ndërtimin e Korridorit 8”, thuhet në njoftim.

Për ndryshimin e qëndrimeve të VMRO-së për “Bechtel dhe Enka”, ka folur edhe kryetari i të Majtës, Dimitar Apasiev. “Nuk do të bëhen para zgjedhjeve lokale sepse kjo do t’i shpërthejë ballonin e VMRO-DPMNE-së si parti popullore. Do të vazhdojnë, qeveria është e ëmbël dhe e shihni që çdo gjë që mohuan në fushatë dhe më parë, tash po e festojnë si një mrekulli diplomacie për Marrëveshjen e Prespës ose tani po priten shirita për “Bechtel dhe Enka”. Mos u besoni këtyre politikanëve kryesorë. Kini kujdes për kë votoni”, vlerëson Apasiev.

Ndërkaq, sipas drejtorit të Ndërmarrjes Publike për rrugë shtetërore, Koce Trajanovski, gjysma e procedurës për shpronësimin e pronës ka përfunduar. Ai bëri të ditur se deri në fund të vitit do të përfundojë tërësisht dhe theksoi se sipas kontratës është dashur të përfundojë edhe para se të bëhej drejtor. “Për 12 muaj janë shpronësuar 1117 parcela kadastrale dhe pasi jam bërë drejtor për dy muaj e gjysmë kemi shpronësuar 2432 parcela”, ka shkruar Trajanovski në rrjetet sociale.

Sipas vlerësimit fillestar të kontraktorëve, është dashur të konfiskohen rreth 60 hektarë tokë në fshatrat “Gorna dhe Dolna Banjica”, që është e barabartë me 120 fusha futbolli. Në këmbim, vendasit do të marrin 650 denarë (rreth 10 euro) për metër katror tokë. Prokurori publik i shtetit Ljupço Kocevski tashmë në qershor të këtij viti kishte paralajmëruar se vendimi i prokurorit publik për këtë rast mund të pritet së shpejti, por deri më tani nuk ka epilog. “Deri më tani ka disa palogjikshmëri në kontratë. Po ndërmerren veprime dhe mendoj se ndoshta së shpejti Prokuroria Publike do të dalë me vendim të prokurorit publik”, ka thënë Kocevski, në intervistën për “360 gradë”.

Ndërkaq, analisti politik Eroll Rizaov në një kolumnë të tij për DW, komenton ndryshimin e qëndrimit, apo siç thotë ai, injorancën e VMRO-së kundrejt Korridorit 8. Ai shkruan se marrëveshja “kriminale” me “Bechtel dhe Enka” që u premtua se do të anulohej, tani nuk është më kriminale.

“Është premtuar se autostradën nga Gostivari në Bukojçan do ta ndërtojnë kompanitë vendore të ndërtimit. Tani, për herë të parë pas 50 vitesh, ajo marrëveshje bëhet reale, siç thotë ministri i transportit dhe zëvendëskryeministër Aleksandar Nikolloski. Një tjetër ditë e madhe në historinë moderne maqedonase të gënjeshtrave të mëdha. Deri më tani nuk është bërë asgjë, por pas ardhjes së qeverisë së re gjërat nisën me ritme të furishme. Si mendoni, a e di ministri i Transporteve se pjesa më e rëndësishme në ndërtim është të bëhet një projekt i mirë dhe hetime të sakta gjeoteknike. Deri më tani e kanë bërë ‘Bechtel dhe Enka’. A mund të shpronësohet toka ku do të kalojë autostrada, nëse nuk dihet se ku do të ndërtohet, pra nëse nuk ka projekt. Me atë ekspertizë, Nikolloski tashmë për një orë e tridhjetë minuta ka arritur në Ohër dhe Strugë, ndonëse detyrat më të vështira tashmë janë kryer. Por kjo nuk vlen derisa ai të vlerësojë se çfarë është më e vështira në ndërtim. Më keq se injoranca është vetëm te menduarit se di diçka”, ka shkruar analisti politik, Eroll Rizaov.

Debatet kanë ndjekur këtë projekt që nga fillimi i tij. Së pari, një ligj i ri u miratua “në mënyrë private” për këtë qëllim. Probleme kishte edhe me zgjedhjen e mbikëqyrjes. Përpjekja e parë dështoi për shkak të një lidhjeje ruse dhe e dyta lidhej gjithashtu me skandale me kompanitë e vëzhgimit. Por pavarësisht dyshimeve, Qeveria dhe “Bechtel dhe Enka” nënshkruan kontratën. Edhe Prokuroria Themelore Publike dhe Komisioni Shtetëror për Parandalimin e Korrupsionit (KSHPK) kanë hapur lëndë për korridoret. Një muaj më vonë, deputetët e koalicionit qeverisës LSDM-BDI propozuan ndryshime në ligje për të lehtësuar ndërtimin e rrugëve. Më 10 prill, Parlamenti miratoi nevojën për miratimin e tetë ligjeve pas procedurës së shkurtuar dhe Ligji për Trashëgimi Kulturore u tërhoq.

Presidentja e Komisionit Evropian, Ursula von der Leyen, tha më 24 tetor se Bashkimi Evropian do të mbështesë projektet e energjisë së rinovueshme dhe Korridoret 8 dhe 10. “Kjo në fakt përfshin projektin shumë të rëndësishëm të Korridorit 8 hekurudhor, i cili ju lidh me Shqipërinë, me Bullgarinë perëndimore dhe në lindje. Ai përfshin këtë korridor si dhe Korridorin 10, i cili shkon nga Greqia në Budapest dhe përshkon të gjithë vendin tuaj”, tha Von der Leyen. Sipas saj, këto investime do ta kthejnë Maqedoninë e Veriut në një pikë kyçe për transport dhe do të sjellin përfitime të mëdha për qytetarët. (koha.mk)