Shpenzimet e studentëve: Më shumë me skripta sesa me libra!

Vitet e fundit studentët i marrin librat online falas, por për një aplikim më praktik disa prej tyre po i printojnë. Sipas studentëve, ata shpenzojnë në vit nga 3.000 deri në mbi 6.000 denarë për mjetet e nevojshme studimore dhe literaturë tjetër

 Studentët për vite me radhë mësojnë më së shumti nga librat e kopjuar, tekstet shkollore, prezantimet dhe për të ulur kostot, fotokopjet shpesh blihen nga studentët e gjeneratave të mëparshme. Gjithashtu, ka edhe studentë apo absolventë që dhurojnë librat apo fotokopjet që nuk u duhen, por edhe nga ata që i shesin për të fituar një qindarkë dhe për të plotësuar buxhetin tashmë modest të studentëve.

Ndërkaq, vitet e fundit studentët i marrin librat online falas, por për një aplikim më praktik disa prej tyre po i printojnë. Sipas studentëve, ata shpenzojnë në vit nga 3.000 deri në mbi 6.000 denarë për mjetet e nevojshme studimore dhe literaturë tjetër.

Studentja e fakultetit të mjekësisë në UKM Selvete Iljazi deklaroi për gazetën KOHA se për drejtimin e saj për tetë lëndë, shpenzimi për libra do të jetë nga 2.560 deri në 6.400 denarë, mesatarisht rreth 4.480 denarë, duke përfshirë edhe literaturën shtesë dhe prezantimet.

“Zakonisht për një vit akademik dëgjojmë tetë lëndë, disa prej të cilave janë të përfaqësuara përmes moduleve 1 dhe 2 në të dy semestrat, pra duhet të marrim libra për tetë lëndë, të cilat janë mesatarisht nga 160 deri në 200 faqe. Kostoja për faqe të fotokopjuar është nga dy deri në katër denarë, pra mesatarisht kemi shpenzim prej 4.480 denarësh. Nëse kësaj i shtohet literatura shtesë dhe prezantimet e profesorëve, çmimi arrin mbi 4.000 denarë”, tha studentja.

Ajo shtoi se zakonisht një libër origjinal nga studentët e tjerë të vitit paraprak blihet me çmim prej 500 denarë, pra ajo pagoi 2.000 denarë për katër libra.

Nga ana tjetër, disa nga profesorët kanë botuar literaturë profesionale që ata japin, disa libra janë në dispozicion të studentëve falas online. Profesorë të tjerë i drejtojnë ata për literaturë që mund të gjendet në biblioteka, dhe disa japin mësim nëpërmjet prezantimeve që u dërgojnë studentëve nëpërmjet internetit.

“Si student, ndjej pakënaqësi për disa praktika të profesorëve që dërgojnë prezantime dhe materiale nëpërmjet internetit. Edhe pse kjo është një mundësi e mirë për të pasur qasje në literaturën profesionale, shpesh hasim vështirësi në përdorimin e tyre. Disa pedagogë të lartë nuk dinë të japin leje për të printuar dokumentet PDF që na dërgojnë, gjë që e bën të vështirë studimin dhe përvetësimin e materialeve. Kjo situatë na detyron të punojmë me kufizime, duke penguar procesin e të mësuarit dhe ndikuar në efikasitetin tonë akademik”, theksoi Selvete Iljazi.

Sipas hulumtimit të Forumit për ndryshime në arsim, i publikuar këtë vit, studentët në Fakultetin e Ekonomisë paguajnë 3.520 denarë, në Fakultetin Filologjik 2.012 denarë, ndërsa në Fakultetin e Mjekësisë 6.579 denarë. (koha.mk)