Filipçe njofton takim me Taravarin pas largimit të tij nga qeveria

Lideri i LSDM-së opozitare, Venko Filipçe, bëri të ditur sot se gjatë kësaj jave do të zhvillojë një takim me kryetarin e Aleancës për Shqiptarët, Arben Taravari, i cili së fundmi ka vendosur të largohet nga koalicioni qeveritar dhe t’i bashkohet opozitës.

Takimi ndërmjet Filipçes dhe Taravarit ishte planifikuar fillimisht për javën e kaluar, por është shtyrë për këtë javë.

“E shtymë takimin me Arben Taravarin për këtë javë, kështu që do të takohem me të këto ditë”, deklaroi Filipçe në një konferencë për shtyp, duke iu përgjigjur pyetjeve të gazetarëve.

I pyetur për zhvillimet aktuale në skenën politike dhe shpërbërjen e koalicionit qeveritar, Filipçe tha se ndarja e Taravarit është një tregues i qartë i dobësimit të shumicës parlamentare.

“Taravari ishte një faktor kyç në bllokun politik shqiptar që iu bashkua kësaj qeverie. Do të shohim se si do të shkojnë gjërat në lidhje me koalicionin dhe qëndrimin e Aleancës për Shqiptarët”, shtoi Filipçe.

Lëvizja e Taravarit për t’iu bashkuar opozitës shihet si një zhvillim i rëndësishëm që mund të ndikojë në balancat politike në Kuvend, veçanërisht në prag të sfidave të ardhshme për shumicën qeveritare.