Arsovska akuzon institucionet për mbulim të krimit me legalizimet e paligjshme në Çair

Kryetarja e Shkupit, Danela Arsovska, ka dalë sërish me akuza ndaj institucioneve shtetërore, duke i cilësuar si pjesëmarrëse aktive në mbulimin e një rasti të legalizimit të paligjshëm në Komunën e Çairit, që sipas saj është realizuar përmes dokumenteve të falsifikuara, transmeton Flaka

Sipas Arsovskës, Komuna e Çairit ka dorëzuar më 27 maj një vendim për anulimin e legalizimit pranë Agjencisë për Kadastër të Patundshmërive, i cili është antedatuar më 2 maj për të dhënë përshtypjen se është ndërmarrë para se të zbulohej rasti. Ajo thotë se ky veprim u bë vetëm disa orë pasi kishte paraqitur kallëzime në MPB.

Arsovska akuzon qeverinë dhe Ministrin e Punëve të Brendshme për bashkëpunim në fshehjen e krimit dhe mosveprim në ndalimin e përgjegjësve, përfshirë kryetarin e Çairit, Visar Ganiu, dhe liderit të LD-së, Izet Mexhiti.

Ajo u ka bërë thirrje organeve të ndjekjes dhe prokurorisë publike që të ndërhyjnë urgjentisht për të siguruar provat dhe për të zbardhur rastin, ndërsa në njoftim përmend edhe përfaqësitë diplomatike të SHBA-së, BE-së, Britanisë së Madhe dhe Gjermanisë në Shkup, të cilat thotë se janë informuar për ngjarjen. Flaka Media