Flaka analizon: Danella Arsovska përballë kastave politike

Kryetarja e Shkupit, Danella Arsovska, në një betejë të paprecedentë me partitë dhe liderët politikë që dikur e mbështetën. Çfarë fshihet pas konfliktit të saj me VMRO-DPMNE-në, Visar Ganiun dhe Izet Mexhitin? Një analizë e thelluar nga Flaka për përplasjet që kanë tronditur kryeqytetin ditëve të fundit

Betejat e Danella Arsovskës nuk janë vetëm personale apo institucionale – ato janë pasqyrë e një realiteti politik të fragmentuar dhe të polarizuar, ku çdo përpjekje për pavarësi administrative përballet me rezistencë të fortë nga strukturat e vendosura të pushtetit partiak. Rasti i saj shërben si një ilustrim i qartë i vështirësisë për të ushtruar pushtet real në një ambient ku koalicionet politike janë të përkohshme dhe interesat grupore dominojnë mbi interesin publik.

Në zgjedhjet lokale të vitit 2021, Danella Arsovska shkaktoi një nga surprizat më të mëdha politike në Maqedoninë e Veriut duke fituar postin e kryetares së Qytetit të Shkupit. E paraqitur si kandidate e pavarur, ajo fitoi me mbështetjen e fuqishme të VMRO-DPMNE-së dhe opozitës së djathtë, duke mposhtur kandidatin e LSDM-së, Petre Shilegov, dhe duke i dhënë një goditje të fortë frontit qeverisës në atë kohë, që përfshinte edhe BDI-në. Fitorja e saj u përjetua si një revoltë qytetare kundër kastës politike në pushtet dhe një shpresë për ndryshim në menaxhimin e kryeqytetit.

Aleancë e thyer me VMRO-DPMNE-në

Në zgjedhjet lokale të 2021, Danella Arsovska mori mbështetje të drejtpërdrejtë nga VMRO-DPMNE për të fituar postin e kryetares së Qytetit të Shkupit. Por pak muaj më pas, filloi një përçarje që u kthye në një përplasje të fortë politike.

Shkarkimi i drejtorit të NP “Ujësjellësi dhe Kanalizimi” dhe bojkotimi i seancave nga kryetarët e komunave të VMRO-së shënuan fillimin e prishjes së bashkëpunimit. Arsovska u shpreh hapur kundër partisë që e solli në pushtet, duke e akuzuar për presione politike dhe sabotim të qëllimshëm të projekteve për qytetin.

Akuza të ndërsjella me tone të ashpra

Mickoski dhe partia e tij e akuzuan kryetaren për bllokimin e pesë projekteve madhore në Shkup, përfshirë shkolla dhe çerdhe. Në një deklaratë publike, Arsovska u shpreh se ishte kërcënuar drejtpërdrejt nga lideri i opozitës:

“Kur të bëhem kryeministër, do të tërheqim nëpër rrugë, do ta fshijmë dyshemenë me ty.”

Përplasjet me Visar Ganiun

Konfliktet u zgjeruan edhe me kampin shqiptar, ku kryetari i Komunës së Çairit, Visar Ganiu, organizoi një aksion simbolik, duke hedhur mbeturina para ndërtesës së Qytetit të Shkupit – protestë për, sipas tij, neglizhencën ndaj pastërtisë publike në Çair.

Arsovska u përgjigj me akuza për ndërtim të paligjshëm dhe publikoi dokumente që synonin të komprometonin administratën e Ganiut, duke përmendur shkelje ligjore dhe manipulime me legalizimet në këtë komunë.

Përballje dhe paditë e paralajmëruara

Zëvendëskryeministri i parë dhe ministri i Mjedisit Jetësor, Izet Mexhiti, u përfshi gjithashtu në konflikt, duke …e akuzuar Danella Arsovskën për shpifje dhe sulme të orkestruara, që sipas tij synojnë diskreditimin politik të tij dhe të Lëvizjes Demokratike. Ai paralajmëroi padi ligjore kundër kryetares së Shkupit, duke e cilësuar atë si një “instrument të ri të BDI-së për destabilizimin e shtetit”.

Arsovska nuk qëndroi e heshtur. Ajo e akuzoi Mexhitin për ndërtim të paligjshëm dhe për legalizime fiktive në komunën e Çairit, duke sugjeruar se ai mbron interesa të grupeve të caktuara dhe jo interesin qytetar. Arsovska deklaroi se Mexhiti “promovon projekte të të tjerëve, ndërsa vetë është i zhytur në shkelje të shumta ligjore.”

Politika e ndotur dhe sfida e të pavarurve

Rasti i Danella Arsovskës është ilustrim i qartë i vështirësive me të cilat përballen politikanët e pavarur në Ballkan, sidomos në një mjedis të polarizuar ku partitë tradicionale kontrollojnë jo vetëm pushtetin, por edhe institucionet publike dhe ndërmarrjet.

Që nga aleanca me VMRO-DPMNE-në, e deri tek përplasjet e ashpra me Ganiun dhe Mexhitin, Arsovska është pozicionuar si një figurë që sfidon “kastën politike”, por jo pa pasoja – bojkote, bllokime vendimmarrjeje dhe tensione publike që kanë ndikuar drejtpërdrejt në jetën e qytetarëve të Shkupit.

Vendimi për të mos rikandiduar

Në nëntor të vitit 2024, Arsovska njoftoi se nuk do të kërkojë një mandat të dytë në zgjedhjet lokale të vitit 2025. Ajo përmendi mungesën e bashkëpunimit, polarizimin politik ekstrem dhe sabotimin sistematik si arsyet kryesore për këtë vendim.

A do të ndryshojë Shkupi apo do të rikthehet në duart e kastës?

Pyetja që shtrohet tani është: a ishte Danella Arsovska përjashtim që konfirmon rregullin, apo do të shërbejë si shembull për një model të ri politik që sfidon të vjetrën?

Në çdo rast, përplasja e saj me VMRO-DPMNE-në dhe liderët shqiptarë si Ganiu dhe Mexhiti ka lënë gjurmë në historinë politike të Shkupit – si një periudhë e tensionuar, por edhe si një përpjekje për të ndryshuar sistemin nga brenda. Flaka