Limani: Nëse do të kishte pakënaqësi reale, mungesa e censusit do të matej me mijëra vota, jo me 21

Ish-Ushtruesi i Detyrës kryetar i Komunës së Gostivarit, Valbon Limani, në një intervistë të detajuar në emisionin “Debat në SHENJA”, ka folur për periudhën e menaxhimit të komunës, punët e realizuara, sfidat e procesit zgjedhor dhe pozicionimin e tij politik.

Kursim i rreptë në administratë: “Kontrolloja edhe dritat para se të dilja”

Limani theksoi se gjatë gjithë mandatit të tij ka aplikuar kursim maksimal në çdo sektor të komunës.
“Në Komunën e Gostivarit kursehet gjithçka, Abedin. Që nga dita e parë deri në ditën e fundit. Administratorët e dinë shumë mirë këtë. Sa herë dilja nga komuna, kontrolloja nëse janë fikur të gjitha dritat ose në verë nëse inverterët janë çaktivizuar”, deklaroi ai.

Ai shtoi se kursimi nuk ka qenë vetëm masë financiare, por kulturë institucionale që ka synuar të reduktojë çdo shpenzim të panevojshëm.

Investime të mëdha infrastrukturore: “Nga bulevardet te terrenet sportive”

Pavarësisht sfidave, Limani tha se periudha e tij është shoqëruar me një numër të madh projektesh, të cilat kanë pasur ndikim të drejtpërdrejtë në jetën e qytetarëve:

• Rikonstruktimi i plotë i Bulevardit “Goce Dellçev”
• Rikonstruktimi i Bulevardit “Vëllezërit Gjinoski”
• Hapja e rrugës së re që lidh Çegran–Forinë–Çalë–Gostivar, projekt ende në proces
• Rikonstruktimi i pesë terreneve sportive në qytet
• Investime në një sërë shkollash fillore

Sipas tij, këto investime dëshmojnë se komuna ka punuar “nga qyteti deri në çdo vendbanim rural”.

Dyshimet për mosarritjen e censusit: “Kemi informata të sigurta për instruksione të brendshme”

Limani ngriti dyshime për ndikime të brendshme në raundin e parë të zgjedhjeve lokale në Gostivar, ku censusi mungoi për vetëm 21 vota.

“Ka informata të sigurta se grupe brenda koalicionit VLEN, pas orës 15:00, kanë dhënë instruksione që qytetarët të mos dalin të votojnë”, u shpreh ai.

Ai po ashtu theksoi:

• Lista e votuesve ka pasur mangësi
• Faktorë të tjerë kontribuuan në rezultatin e ngushtë
• “Nëse do të kishte pakënaqësi reale, mungesa e censusit do të matet me mijëra vota, jo me 21.”

Limani paralajmëroi se në raundin e ardhshëm pritet mobilizim shumë më i madh, i cili, sipas tij, do të reflektojë realisht vullnetin qytetar.

Pozicionimi politik: “Nuk jam penduar për koalicionin AKI”

Duke komentuar zgjedhjet dhe bashkëpunimin politik, Limani tha se nuk është penduar për qëndrimin e tij në koalicionin AKI.

“Jo, aspak. Në Gostivar rezultatet janë shumë të qarta. Edhe në Vrapçisht ishte rezultat i jashtëzakonshëm. Besoj se e njëjta situatë do të përsëritet edhe në zgjedhjet e ardhshme”, tha ai.

Sipas tij, vota e qytetarëve ka treguar se projekti politik që ai përfaqëson ka mbështetje të qëndrueshme, dhe raundi i dytë do ta konfirmojë këtë trend. Gazeta Flaka