Kujdes me mjaltin: rrezik serioz për foshnjat nën 1 vjeç

Mjalti njihet si një nga produktet natyrale më të shëndetshme, i përdorur gjerësisht për lehtësimin e problemeve si kolla, temperatura apo edhe astma. Megjithatë, ekspertët paralajmërojnë se ai mund të jetë i rrezikshëm për foshnjat nëse konsumohet në moshë shumë të hershme.

Sipas Akademisë Amerikane të Pediatrisë, prindërit nuk duhet t’u japin fëmijëve mjaltë – veçanërisht të papërpunuar ose të papasterizuar – para moshës njëvjeçare. Arsyeja kryesore lidhet me rrezikun e zhvillimit të Botulizmi foshnjor, një gjendje e rrallë por shumë serioze.

Kjo sëmundje shkaktohet nga sporet e baktereve që mund të gjenden në mjaltë dhe që, pasi hyjnë në organizmin e foshnjës, zhvillohen në traktin tretës. Pasojat mund të jenë të rënda, duke përfshirë dobësim të muskujve, probleme me frymëmarrjen dhe në raste ekstreme edhe rrezik për jetën nëse nuk trajtohet me kohë.

Ekspertët theksojnë se sistemi tretës i foshnjave nuk është ende i zhvilluar mjaftueshëm për të përballuar këto baktere, ndaj shmangia e mjaltit në vitin e parë të jetës është thelbësore.

Simptomat që duhet të vërehen:

• Kapsllëk
• Plogështi dhe irritim
• Zbehje në fytyrë
• Refuzim i ushqyerjes me gji

Prindërit këshillohen që në rast të shfaqjes së këtyre simptomave të kërkojnë menjëherë ndihmë mjekësore.

Flaka