Çfarë ndodh në trup kur ha një ushqim të caktuar para gjumit?

Një studim i publikuar në revistën Nutrition sugjeron se konsumimi i gjizës para gjumit mund të ketë efekte pozitive në metabolizëm, rikuperimin e muskujve dhe kontrollin e peshës trupore gjatë natës.

Për një kohë të gjatë është menduar se ngrënia vonë në mbrëmje mund të çojë në shtim peshe, pasi trupi i ruan kaloritë si yndyrë. Megjithatë, sipas nutricionistit Michael Ormsbee, ky rregull nuk vlen për ushqimet e pasura me proteina, si gjiza e freskët.

Ai shpjegon se një sasi e vogël gjize e konsumuar rreth 30 minuta para gjumit mund të ndihmojë organizmin në procesin e rikuperimit dhe të ofrojë një alternativë më të shëndetshme ndaj ushqimeve të zakonshme të natës.

Sipas tij, proteina kryesore e gjizës, kazeina, tretet ngadalë dhe siguron furnizim të vazhdueshëm me aminoacide gjatë gjithë natës, të cilat ndihmojnë në ndërtimin e muskujve, riparimin e indeve dhe mbështetjen e sistemit imunitar.

Profesori Ormsbee nga Florida State University thekson se studimi sjell një perspektivë të re mbi rolin e ushqimit natyral në mbrëmje dhe ndikimin e tij në shëndet.

Studiuesit sugjerojnë se përfshirja e proteinave të lehta para gjumit mund të ndihmojë në ruajtjen e masës muskulore dhe optimizimin e proceseve metabolike, pa pasur nevojë për suplemente të përpunuara.

Flaka