Luka Modrić drejt rinovimit me AC Milan – kroati vendos 2 kushte për të qëndruar

E ardhmja e mesfushorit kroat Luka Modrić te AC Milan mund të marrë një kthesë pozitive, pasi lojtari raportohet i gatshëm të zgjasë qëndrimin edhe për një sezon tjetër me kuqezinjtë.

Kontrata aktuale e veteranit skadon më 30 qershor, por sipas raportimeve ekziston mundësia e rinovimit për një vit shtesë, në varësi të disa kushteve të vendosura nga vetë lojtari.

Sipas mediave italiane, Modrić ka dhënë sinjale të qarta se dëshiron të vazhdojë në Milano, por ka kërkuar dy kushte kryesore përpara se të marrë vendimin final.

Kushti i parë lidhet me objektivin sportiv të klubit: kualifikimin në Champions League sezonin e ardhshëm, një objektiv që Milani mund ta sigurojë në ndeshjen që aktualisht po luan kundër Cagliarit (1-2).

Kushti i dytë ka të bëjë me të ardhmen e trajnerit Massimiliano Allegri, pasi Modrić kërkon vazhdimësinë e tij në pankinën e Milanit edhe për sezonin e ardhshëm.

Raportohet gjithashtu se marrëdhënia mes Modrić dhe Allegrit është shumë e fortë, aq sa kroati mund të përfshihet në të ardhmen edhe në stafin teknik pas përfundimit të karrierës së tij si futbollist.

Tani gjithçka mbetet në pritje të vendimeve përfundimtare, ndërsa Milani duhet fillimisht të përmbushë objektivat sportive për të bindur mesfushorin veteran të vazhdojë aventurën në Serie A.

Flaka