Kontradiktë brenda VLEN-it: Kasami mbron Shasivarin, ndërsa deklarata e ministrit ngre pikëpyetje

Kreu i VLEN-it, Bilall Kasami, dhe ministri i Drejtësisë, Jeton Shasivari, kanë dalë me qëndrime që krijojnë dallime në interpretimin e deklaratave të fundit për dënimet ndaj ish-krerëve të UÇK-së në Hagë.

Shasivari, duke folur për vendimin e Gjykatës Speciale, tha se katër të dënuarit “në aspektin juridik konsiderohen të pafajshëm”, përderisa aktgjykimi nuk është i plotfuqishëm. Ai gjithashtu theksoi se respektimi i vendimit gjyqësor nuk nënkupton domosdoshmërisht pajtim me të, duke iu referuar të drejtës së ankesës.

Ndërkohë, Bilall Kasami e ka interpretuar deklaratën e ministrit në kuadër të parimit juridik të prezumimit të pafajësisë. Sipas tij, Shasivari nuk ka bërë vlerësim politik të vendimit, por është ndalur te aspekti juridik i statusit të të dënuarve deri në përfundimin e të gjitha instancave gjyqësore.

Por, në deklarimin e tij, Shasivari ka shkuar edhe më tej, duke e cilësuar të papranueshëm dënimin e krerëve të UÇK-së dhe duke thënë se ai është bazuar në dëshmi të ardhura nga Beogradi.

Kjo ka hapur debat rreth asaj se deri ku është interpretim juridik dhe ku fillon qëndrimi politik ndaj vendimit të Hagës.

Në këtë rast, dallimi mes dy deklarimeve brenda VLEN-it qëndron në theksin e vendosur: Kasami e shpjegon qëndrimin e Shasivarit përmes prezumimit të pafajësisë, ndërsa vetë ministri, përveç aspektit juridik, ka shprehur edhe vlerësim mbi bazën e provave dhe pranueshmërinë e dënimit.

Vendimi ndaj ish-krerëve të UÇK-së dhe qëndrimet e zyrtarëve shqiptarë në Maqedoninë e Veriut vazhdojnë të jenë temë e debatit publik. Gazeta Flaka