Ahmeti takon përfaqësuesin shqiptaro-amerikan: “Marrëveshja e Ohrit dhe gjuha shqipe nuk mund të mbeten peng i stagnimit”

Kreu i BDI-së, Ali Ahmeti, ka zhvilluar një takim me Bruno Cekën, Përfaqësues i Organizatës Shqiptaro-Amerikane për Maqedoninë e Veriut, ku në fokus kanë qenë zhvillimet politike në vend dhe çështjet që prekin drejtpërdrejt të drejtat e shqiptarëve.

Ahmeti bëri të ditur se gjatë takimit është diskutuar për stagnimin në zbatimin e Marrëveshjes së Ohrit, cenimin e Ligjit për Përdorimin e Gjuhës Shqipe dhe nevojën për garantimin e përfaqësimit të drejtë dhe adekuat të shqiptarëve në institucionet shtetërore.

“Zhvilluam një bisedë të hapur mbi zhvillimet politike në vend, me theks të veçantë te stagnimi në zbatimin e Marrëveshjes së Ohrit, cenimi i Ligjit për Përdorimin e Gjuhës Shqipe dhe nevoja për garantimin e përfaqësimit të drejtë dhe adekuat të shqiptarëve në institucionet shtetërore”, deklaroi Ahmeti.

Në takim është diskutuar edhe procesi i integrimit të Maqedonisë së Veriut në Bashkimin Evropian, të cilin Ahmeti e cilësoi si orientim strategjik, si dhe rëndësia e forcimit të partneritetit me Shtetet e Bashkuara të Amerikës.

Një tjetër temë e rëndësishme ishte ngërçi lidhur me dhënien e provimit të jurisprudencës, çështje që prek një numër të madh të rinjsh profesionistë.

Ahmeti theksoi nevojën që kjo çështje të zgjidhet sa më shpejt dhe që institucionet të zbatojnë kuadrin ligjor ekzistues.

Sipas Ahmetit, takimi me Cekën ishte një mundësi për të diskutuar mbi sfidat aktuale dhe për të riafirmuar angazhimin për avancimin e të drejtave të shqiptarëve dhe orientimin evropian të vendit.