BDI: “VLEN-i” ekziston si emër për propagandë, BESA vazhdon të figurojë si subjekt politik

BDI ka reaguar ndaj pretendimeve për bashkimin e partive që përbëjnë VLEN-in në një subjekt të vetëm, duke e cilësuar këtë proces si “mashtrim politik”.

Sipas BDI-së, para qytetarëve VLEN paraqitet si një subjekt i bashkuar, ndërsa të dhënat zyrtare, sipas tyre, tregojnë një situatë tjetër.

BDI i referohet një dokumenti të Regjistrit Qendror, të lëshuar më 17 gusht 2026, sipas të cilit Lëvizja BESA vazhdon të figurojë si parti aktive, me Bilall Kasamin si kryetar dhe me autorizim të pakufizuar.

“Mashtrim është kauza e tyre. Mashtrim është organizimi i tyre. Mashtrim është edhe e ashtuquajtura shkrirje në një parti”, thuhet në reagimin e BDI-së.

Sipas kësaj partie, VLEN vazhdon të përdoret si emërtim politik përpara opinionit, ndërsa partitë, kryetarët dhe strukturat juridike vazhdojnë të ekzistojnë veçmas.

BDI akuzon gjithashtu VLEN-in se ka ardhur në skenën politike me premtime për ndryshim dhe përfaqësim të shqiptarëve, por se, sipas saj, në praktikë ka sjellë përçarje dhe dobësim të peshës politike shqiptare.

Në reagim përdoret edhe termi “s’Vlen-i”, me të cilin BDI e akuzon koalicionin se është krijuar për të fragmentuar votën shqiptare dhe për të ulur fuqinë e saj në vendimmarrje.

“Një mashtrim politik, i paketuar si bashkim. Një grup interesash personale, i shitur si kauzë kombëtare”, përfundon reagimi i BDI-së.