ASH mohon përçarjen: Taravari, Shabani dhe Limani hedhin poshtë zërat për përçarje

Zërat për një shkëputje të mundshme të kryetarit të Komunës së Vrapçishtit, Isen Shabani, dhe kryetarit të Komunës së Gostivarit, Valbon Limani, nga Aleanca për Shqiptarët dhe kalimin e tyre në VLEN kanë marrë përgjigje të drejtpërdrejtë nga drejtuesit e ASH-së.

Kryetari i Aleancës për Shqiptarët, Arben Taravari, ka mohuar informacionet se Isen Shabani është në prag të kalimit në VLEN, duke theksuar se komunikimi mes tyre është i vazhdueshëm.

Taravari tha se është në kontakt të përditshëm me Shabanin dhe se informacionet për largimin e tij nga ASH-ja nuk qëndrojnë.

“Iseni është kryetar i komunës i zgjedhur nga koalicioni AKI. Dhe vazhdon të jetë anëtar i kryesisë së ASH-së”, deklaroi Taravari.

Reagimi i tij vjen pas raportimeve se Shabani mund të jetë një nga kuadrot e ASH-së që do t’i bashkohej VLEN-it. Televizioni Alsat-M kishte raportuar se Shabani ishte parë në një darkë me kryeshefin e SPB-së në Tetovë, Rijat Ali, duke pretenduar se, sipas informacioneve jozyrtare, në takim ishte diskutuar edhe mundësia e kalimit të tij në VLEN.

Megjithatë, Shabani i është përgjigjur këtyre zërave në mënyrë simbolike, duke publikuar fotografi me liderin e ASH-së, Arben Taravari, me mbishkrimin e shkurtër: “Vazhdojmë…”.

Mesazhi i kryetarit të Vrapçishtit vjen si sinjal politik se, të paktën publikisht, ai nuk e konsideron veten pjesë të ndonjë lëvizjeje drejt VLEN-it.

Edhe kryetari i Komunës së Gostivarit, Valbon Limani, ka mohuar kategorikisht se po zhvillon negociata për kalim në VLEN apo për ndonjë rikonfigurim politik.

“Sa u përket çështjeve të tjera, përveç bisedave kolegiale që lidhen me bashkëpunimin ndërkomunal, në kuadër të Rajonit të Pollogut apo programeve qeveritare, nuk ka asnjë lloj bisede apo negocimi tjetër në vazhdim”, deklaroi Limani.

Ai theksoi se mbetet anëtar i Aleancës për Shqiptarët dhe se partia vazhdon të funksionojë si subjekt autonom.

“Jam anëtar i Aleancës për Shqiptarët, e cila mbetet parti autonome, dhe nuk ekziston asnjë zhvillim që do të sugjeronte bisedime apo rikonfigurime të skenës politike”, tha Limani.

Limani shtoi se fokusi i tij mbetet te puna në Komunën e Gostivarit, ndërsa paralajmëroi edhe përgatitjet për Kongresin e ardhshëm të ASH-së.

“Në të njëjtën kohë, vazhdojmë përgatitjet për Kongresin e Aleancës për Shqiptarët, i cili do të mbahet së shpejti”, tha ai.

Kasami foli për bisedime me ASH-në

Në anën tjetër, lideri i VLEN-it, Bilall Kasami, ka deklaruar se po zhvillohen bisedime me eksponentë të opozitës shqiptare për përfshirje në qeveri.

Kasami, i pyetur nëse bëhet fjalë për bisedime edhe me Isen Shabanin dhe Valbon Limanin, ka konfirmuar se me Aleancën për Shqiptarët e drejtuar nga Ziadin Sela po zhvillohen bisedime për bashkim me shumicën qeverisëse.

Këto deklarata hapën hapësirë për spekulime rreth lëvizjeve të mundshme të kuadrove të ASH-së, veçanërisht në Pollog, ku Shabani dhe Limani drejtojnë dy nga komunat kryesore të rajonit.

Por, deri tani, nga ana e figurave të përmendura nuk ka konfirmim për ndonjë kalim në VLEN.

Përkundrazi, Taravari, Shabani dhe Limani kanë dhënë mesazh të njëjtë: ASH-ja vazhdon të jetë kompakte, ndërsa dy kryetarët komunalë mbeten në strukturat e saj.

Në këtë situatë, deklaratat e VLEN-it për bisedime me kuadro të opozitës shqiptare dhe reagimet e menjëhershme nga ASH-ja e kanë kthyer çështjen në një përplasje politike dhe mediatike, ku secila palë po tenton të përcaktojë narrativën për forcën dhe ndikimin e saj në terren.

Nëse nuk pasojnë zhvillime konkrete, deklaratat për “kalime” të reja mund të mbeten pjesë e presionit politik dhe të betejës për perceptimin e opinionit, veçanërisht në prag të Kongresit të ASH-së. Gazeta Flaka