Shkupi do “propozim francez” të ri!

Mickoski sqaroi se i ashtuquajturi propozimi francez, nga i cili dolën ndryshimet kushtetuese, është në fakt një rinegociim i marrëveshjes së fqinjësisë së mirë. Komenti i tij pasoi pasi ambasadorja amerikane Angela Aggeler tha se nuk do të ketë negociata as për Prespën, as me Bullgarinë për BE

 Kryeministri Hristijan Mickoski nuk sheh arsye që të mos shtohet një tjetër propozim në Marrëveshjen e fqinjësisë së mirë me Bullgarinë. Lidhur me këtë, Mickoski sqaroi se i ashtuquajturi propozimi francez, nga i cili dolën ndryshimet kushtetuese, është në fakt një rinegociim i marrëveshjes së fqinjësisë së mirë. Komenti i tij pasoi pasi ambasadorja amerikane Angela Aggeler tha në një intervistë për Radion Evropa e Lirë se nuk do të ketë negociata as për Prespën, as me Bullgarinë për BE. “Sa i përket ndryshimeve kushtetuese, të cilat janë pjesë e të ashtuquajturit Propozimi francez, i cili është një shtesë në marrëveshjen e fqinjësisë së mirë, pra rinegociimin e marrëveshjes së fqinjësisë së mirë, dhe në lidhje me këtë, ju e dini qëndrimin tonë se ne nuk pranojmë diktatet dhe ultimatumet, kështu që nëse është e mundur, marrëveshja e fqinjësisë mund të rinegociiohet dhe t’i shtohet e ashtuquajtura Propozimi francez, nuk shoh arsye pse të mos shtohet një propozim francez plus apo ndonjë propozim tjetër, i cili do të mbulojë kërkesat e popullit maqedonas, të maqedonasve në Bullgari”, tha Mickoski.

Ai përsëriti se ne nuk mund të ndjekim një politikë të standardeve të dyfishta. “Nëse kërkojmë ndryshim të Kushtetutës për disa qindra bashkëqytetarë tanë, të cilët thonë se janë pjesë e komunitetit bullgar, atëherë duhet të shohim se çfarë do të ndodhë me ata qytetarë të fqinjit tonë lindor, të cilët thonë se janë pjesë e komunitetit maqedonas. Askush nuk është kundër komunitetit bullgar, ne i respektojmë ata disa qindra bashkëqytetarë tanë, të cilët thonë se janë pjesë e komunitetit bullgar”, tha Mickoski, por kërkojmë nga presidenti i Bullgarisë që të respektojë të drejtat e njeriut dhe  pakicës të komunitetit maqedonas atje.

Ambasadori i BE-së, David Gir, tha se ai nuk sheh asnjë mundësi për ndryshimin e Kornizës Negociuese të vendit “dhe ky qëndrim nuk ka ndryshuar që nga zgjedhjet e BE”. Gir zhvilloi një takim me Ministrin e Çështjeve Evropiane Orhan Murtezani, të cilin ai e përshkroi si “një fillim të mbarë”. Të dy diskutuan programin e reformave në vend, i cili është pjesë e planit të BE-së për rritjen në Ballkanin Perëndimor. “Ne do ta vlerësojmë Qeverinë në bazë të asaj që bën. Nëse ai dëshiron të ecë përpara në rrugën e integrimit evropian, ne do të jemi partnerë të vendosur dhe të përkushtuar”, tha Gir.

Murtezani theksoi se nuk ka dyshime për anëtarësimin e vendit në Bashkimin Evropian dhe rrugën e tij euroatlantike, por sipas tij, ajo që po vonon është protokolli me Bullgarinë, i cili është pjesë e Kornizës negociuese. Sipas tij, “do të ketë bisedime të rëndësishme në qeveri dhe me Brukselin për të gjetur zgjidhjen më të mirë pa krijuar probleme në rrugën e vendit drejt BE-së, dhe ndryshimet në Kushtetutë, të cilat janë kusht për fillimin e vërtet të negociatave për Maqedoninë e Veriut me BE-në, ato do të ndodhin, por kërkon një proces gjithëpërfshirës në të cilin do të ketë një konsensus të gjerë kombëtar”.

Para dy ditësh qëndrimin se nuk mund të ketë rinegociim të Kornizës negociuese me ndryshimin e marrëveshjes me Bullgarinë, e shprehu edhe ambasadorja amerikane në vend. Angela Aggeler, ka theksuar se të dyja marrëveshjet janë punë e kryer dhe nuk ka negociata të reja për përparim drejt BE-së. (koha.mk)