Kujdes nga mashtrimi i ri në WhatsApp: Një klikim mund t’u japë sulmuesve qasje në llogarinë tuaj

Përdoruesit e WhatsApp duhet të jenë të kujdesshëm ndaj mesazheve që u kërkojnë të votojnë për një fëmijë, kafshë shtëpiake apo pjesëmarrës në një konkurs, pasi pas këtyre lidhjeve mund të fshihet një mashtrim phishing.

Sulmuesit mund të dërgojnë mesazhe nga numra të njohur dhe të paraqiten si miq apo familjarë. Kjo e bën mashtrimin më të besueshëm, pasi përdoruesi mund të mendojë se mesazhi vjen nga një person që njeh.

Sipas paralajmërimeve për këtë fushatë, qëllimi është që viktima të klikojë lidhjen dhe, pa e kuptuar, të lejojë një pajisje tjetër të lidhet me llogarinë e saj në WhatsApp.

Në këtë mënyrë, sulmuesi mund të fitojë qasje në biseda, kontakte dhe të dërgojë mesazhe në emër të viktimës. Madje, llogaria mund të vazhdojë të funksionojë normalisht për përdoruesin, ndërsa pajisja e paautorizuar mbetet e lidhur në sfond.

Një nga teknikat e përmendura në lidhje me këtë lloj sulmi njihet si GhostPairing, e cila shfrytëzon funksionin legjitim të WhatsApp-it për lidhjen e pajisjeve shtesë.

Si ta kontrolloni nëse WhatsApp-i juaj është komprometuar?

Për të kontrolluar pajisjet që kanë qasje në llogarinë tuaj, hapni:

WhatsApp → Cilësimet (Settings) → Pajisjet e lidhura (Linked Devices)

Kontrolloni listën dhe, nëse shihni ndonjë pajisje që nuk e njihni, hiqeni menjëherë nga llogaria.

Ekspertët këshillojnë gjithashtu që të mos hapni lidhje të dyshimta, edhe nëse ato vijnë nga persona që njihni. Nëse një mik ose familjar ju kërkon papritur të votoni në një konkurs, verifikojeni kërkesën përmes një kanali tjetër komunikimi.

Gjithashtu, mos konfirmoni lidhjen e një pajisjeje të re dhe mos skanoni kode QR të dërguara në mesazhe, nëse nuk e keni nisur vetë procesin.

Një mesazh nga një kontakt i njohur nuk është gjithmonë garanci se është i sigurt, pasi edhe llogaria e atij personi mund të jetë komprometuar.

Flaka