Moti i ligë godet Kroacinë, erërat e forta shkaktojnë dëme të mëdha – breshëri me madhësi të topit të tenisit shkatërroi shtëpitë dhe veturat

Një stuhi e fortë ka goditur mbrëmë shumicën e vendeve të Ballkanit. Një prej atyre vendeve që është goditur më rëndi është edhe Kroacia, ku komuna Boshnjaci regjistroi reshje të breshrit me madhësi të një veze.

Erërat dhe breshëria dëmtuan çatitë dhe fasadat e shtëpive, që janë bërë plot me vrima, kur shumë vetura janë dëmtuar, e serra u shkatërruan plotësisht ku si pasojë të mbjellat u dëmtuan, transmeton Telegrafi.

“Katastrofë. Së pari në orën 19:30 filloi të bjerë breshër në madhësinë e një topi tenisi, pa shi, me erëra të forta. Shumë shpejtë u errësua, nuk kishte rrymë. Madje në instalimet elektrike pati zjarr’, tha kryetari i komunës, Andrija Juzbashiq.

“Që në orën 5 të mëngjesit jam në këmbë. Është një fatkeqësi. Përmasat e dëmeve janë të mëdha. Nuk ka shtëpi apo fasadë që nuk është dëmtuar. Breshëri sa një top tenisi ka rënë për gjysmë ore. Në orën 7 ka mbërritur delegacioni i prefektit, ka telefonuar edhe kryeministri, zëvendëskryeministri, ministri Vuçkoviq”, ka thënë ai për HRT.

“Sa i përket dëmit bujqësor, gjithçka u shkatërrua qind për qind, dhe të korrat ishin të mrekullueshme. Është fat që elbi dhe gruri u korrën me kohë. Kjo është me të vërtetë një fatkeqësi”, shtoi Juzbashiq.

Pësuan shtëpitë, fasadat, çatitë, serat, kopshtet, kultura bujqësore. Sasia e dëmit nuk dihet ende, por me siguri do të jetë e madhe. Banorët thonë se kjo tashmë ndodh vit pas viti.